राष्ट्रीय तपास संस्थेत १११ पदांसाठी भरती! ५६ वर्षांपर्यंतच्या उमेदवारांना संधी

नवी दिल्ली : सरकारी सेवेत कार्यरत असलेल्या कर्मचाऱ्यांसाठी महत्त्वाची बातमी आहे. राष्ट्रीय तपास संस्था अर्थात एनआयए (NIA) येथे सहाय्यक उपनिरीक्षक (ASI), हेड कॉन्स्टेबल आणि डेटा एंट्री ऑपरेटर या पदांसाठी एकूण १११ रिक्त जागांची भरती जाहीर करण्यात आली आहे. या भरतीचे वैशिष्ट्य म्हणजे पात्रतेच्या अटी पूर्ण करणाऱ्या ५६ वर्षांपर्यंतच्या उमेदवारांनाही संधी मिळू शकते. पदानुसार २५,५०० ते ९२,३०० रुपयांपर्यंत वेतनश्रेणी असून, अर्ज ऑफलाइन पद्धतीने करायचा आहे. अर्ज करण्याची अंतिम तारीख २० डिसेंबर २०२६ पर्यंत आहे

NIA मध्ये कोणत्या पदांसाठी भरती?

राष्ट्रीय तपास संस्थेने विविध पदांवरील रिक्त जागा भरण्यासाठी भरती प्रक्रिया जाहीर केली आहे. या भरतीमध्ये एकूण १११ पदांचा समावेश आहे.  

पदाचे नाव
सहाय्यक उपनिरीक्षक (ASI) – २३
हेड कॉन्स्टेबल- ५३
डेटा एंट्री ऑपरेटर (DEO) – ३५

या भरतीमध्ये हेड कॉन्स्टेबल पदासाठी सर्वाधिक ५३ जागा उपलब्ध आहेत. त्यानंतर डेटा एंट्री ऑपरेटरच्या ३५ आणि सहाय्यक उपनिरीक्षकाच्या २३ जागा आहेत.

५६ वर्षांपर्यंतच्या उमेदवारांना संधी

या भरतीमध्ये कमाल वयोमर्यादा ५६ वर्षांपर्यंत असल्याचे नमूद करण्यात आले आहे. मात्र, ही नियमित थेट भरती नसून प्रतिनियुक्तीच्या (Deputation) आधारावर केली जाणार आहे. त्यामुळे प्रामुख्याने पात्र सरकारी कर्मचारी या भरतीसाठी अर्ज करू शकतात.

उमेदवारांनी अर्ज करण्यापूर्वी संबंधित पदासाठी आवश्यक शैक्षणिक पात्रता, अनुभव, सेवाशर्ती आणि प्रतिनियुक्तीचे निकष अधिकृत अधिसूचनेतून तपासणे आवश्यक आहे.

किती मिळणार पगार?

एनआयएतील या पदांसाठी पदानुसार २५,५०० ते ९२,३०० रुपयांपर्यंत वेतनश्रेणी असल्याचे दिलेल्या माहितीत नमूद करण्यात आले आहे. प्रत्यक्ष वेतन संबंधित पदाची वेतनश्रेणी, उमेदवाराची पात्रता आणि लागू सेवाशर्तींनुसार निश्चित होईल.

अर्ज कसा करायचा?

या भरतीसाठी ऑनलाइनऐवजी ऑफलाइन पद्धतीने अर्ज स्वीकारले जाणार आहेत. इच्छुक आणि पात्र उमेदवारांनी अधिकृत अधिसूचनेत दिलेल्या नमुन्यानुसार अर्ज भरून आवश्यक कागदपत्रांसह निर्धारित पत्त्यावर पाठवायचा आहे.