जळगाव जिल्ह्यातील नशिराबाद येथे पोलिसांनी मोठी कारवाई करत दरोड्याच्या गुन्ह्यात फरार असलेल्या १८ वर्षीय तरुणाच्या गावठी कट्ट्यासह मुसक्या आवळल्या आहे. नशिराबादच्या बसस्थानक परिसरात संशयास्पद हालचाली करत असताना कोंबिंग ऑपरेशनदरम्यान आरोपीला रंगेहाथ पकडण्यात आल्याने परिसरात खळबळ उडाली आहे.
मिळालेल्या माहितीनुसार, २३ मार्च २०२६ रोजी जिल्हा पोलीस अधीक्षकांच्या आदेशानुसार नशिराबाद पोलीस स्टेशन हद्दीत विशेष कोंबिंग ऑपरेशन सुरू होते. यावेळी पोलिसांना गुप्त माहिती मिळाली की, दरोड्याच्या गुन्ह्यातील फरार आरोपी चेतन सूर्यभान पाटील हा बसस्थानक परिसरात गावठी कट्टा घेऊन फिरत आहे.
या माहितीच्या आधारे पोलिसांनी तात्काळ सापळा रचून रात्री सुमारे ८.२० वाजता आरोपीला ताब्यात घेतले. तपासणीदरम्यान त्याच्या ताब्यातून लोखंडी बनावटीचा गावठी कट्टा आणि डमी गोळी जप्त करण्यात आली. या प्रकरणी आरोपीविरुद्ध नशिराबाद पोलीस ठाण्यात शस्त्र अधिनियम कलम ३/२५ अन्वये गुन्हा दाखल करण्यात आला असून पुढील तपास सुरू आहे.
पोलिसांनी केलेल्या या धाडसी कारवाईमुळे फरार आरोपींविरोधातील मोहीम अधिक तीव्र करण्यात येणार असल्याचे संकेत मिळत असून, परिसरात कायदा व सुव्यवस्था राखण्यासाठी पोलिसांची सतर्कता वाढविण्यात आली आहे.
Discussion about this post