आखाती देशांमध्ये सुरू असलेल्या युद्धाच्या पार्श्वभूमीवर देशात एलपीजीचा तुटवडा निर्माण झाला असून अनेक नागरिकांना वेळेवर गॅस सिलिंडर मिळत नसल्याने अडचणी वाढल्या आहेत. या परिस्थितीत केंद्र सरकारने सर्वसामान्यांना दिलासा देणारा महत्त्वाचा निर्णय घेतला आहे. आता नागरिकांना फक्त ओळखपत्र दाखवून ५ किलोचा छोटा गॅस सिलिंडर खरेदी करता येणार आहे.
सरकारच्या माहितीनुसार, ५ किलोच्या छोट्या गॅस सिलिंडरची मागणी मोठ्या प्रमाणात वाढली असून २३ मार्चपासून आतापर्यंत ६.६ लाखांहून अधिक सिलिंडरची विक्री झाली आहे. केवळ ४ एप्रिल रोजीच ९० हजारांपेक्षा जास्त सिलिंडर विकले गेल्याची माहिती देण्यात आली आहे. विशेष म्हणजे, हा सिलिंडर घेण्यासाठी पत्त्याचा पुरावा आवश्यक नसून फक्त ओळखपत्र दाखवणे बंधनकारक करण्यात आले आहे.
केंद्र सरकारने ५ किलोचे छोटे सिलिंडर उपलब्ध करून देण्यावर जास्त भर दिला आहे. त्यामुळे आता ओळखपत्रावर गॅस सिलिंडर मिळणार आहे. प्रवासी, स्थलांतरीत कामगार, विद्यार्थी आणि रोजंदारीवर काम करणाऱ्यांची गैरसोय होऊ नये आणि त्यांना वेळेत गॅस सिलिंडर मिळावा यासाठी सरकारने हा निर्णय घेतला आहे. हे सिलिंडर तुम्हाला सिलिंडर वितरकांकडून किंवा स्थानिक दुकानदारांकडून खरेदी करता येतील. काळाबाजार रोखण्यासाठी सरकारने ५ किलोच्या गॅस सिलिंडरची खरेदी करताना ओळखपत्र बंधनकारक केले आहे. दरम्यान, सरकारने व्यावसायिक गॅस सिलिंडर खेरदीच्या नियमामध्ये मोठा बदल केला आहे. व्यावसायिकांना गॅस सिलिंडर खरेदी करण्यासाठी पीएनजी फॉर्म भरणे बंधनकारक असणार आहे. या निर्णयामुळे हॉटेल्स, ढाबे आणि छोटे व्यवसाय करणाऱ्यांवर परिणाम होणार आहे. यामागचे कारण म्हणजे हे सर्वजण आधी एलपीजी सिलिंडरवर अवलंबून होते. या निर्णयामुळे प्रणालीमध्ये पारदर्शकता येईल आणि पाईपद्वारे पुरवल्या जाणाऱ्या पीएनजी गॅसला जास्त प्रतिसाद मिळेल असे सरकारचे मत आहे.
Discussion about this post