ऑनलाईन अर्ज दाखल केलेल्या नागरिकांनाच ०२ मार्च रोजी उपस्थीत राहण्याचे आवाहन
जळगाव | जळगाव जिल्ह्यातील नागरिक व शेतकऱ्यांच्या विविध समस्या सोडविण्यासाठी दर महिन्याच्या पहिल्या सोमवारी जिल्हास्तरावर लोकशाही दिनाचे आयोजन करण्यात येते. नागरिकांचा वेळ, प्रवास खर्च व श्रम वाचविण्याच्या दृष्टीने जिल्हा प्रशासनाने लोकशाही दिनासाठी ऑनलाईन अर्ज नोंदणी प्रक्रिया अधिक सुलभ व सुटसुटीत केली आहे.
यापुढे लोकशाही दिनासाठी अर्ज करण्यासाठी नागरिकांना प्रत्यक्ष जिल्हाधिकारी कार्यालयात येण्याची आवश्यकता राहणार नाही. नागरिकांनी आता आपले अर्ज जिल्हाधिकारी जळगाव यांच्या अधिकृत संकेतस्थळावर Jalgaon.gov.in या संकेतस्थळावर ऑनलाईन पद्धतीने दाखल करावेत, अशी सुविधा उपलब्ध करून देण्यात आली आहे.
लोकशाही दिनासाठी ऑनलाईन अर्ज नोंदणी प्रक्रिया दर महिन्याच्या १ ते १५ तारखेपर्यंत ऑनलाईन सुरू राहणार आहे. या कालावधीत प्राप्त झालेल्या अर्जांवर संबंधित विभागाकडून कार्यवाही करून अर्जदारास लेखी कळविण्यात येणार आहे.
दिनांक ०२ मार्च २०२६ रोजी आयोजित करण्यात येणाऱ्या लोकशाही दिनासाठी १ फेब्रुवारी २०२६ ते १५ फेब्रुवारी २०२६ या कालावधीत ऑनलाईन अर्ज दाखल केलेल्या नागरिकांनीच उपस्थित राहावे. लोकशाही दिनात याच कालावधीत प्राप्त झालेल्या अर्जांचा संबंधित विभागांकडून आढावा घेण्यात येणार आहे. दूरवरच्या तालुक्यांमधून जिल्हाधिकारी कार्यालयात येण्याऐवजी नागरिकांनी ऑनलाईन अर्ज करून आधुनिक सुविधेचा लाभ घ्यावा, असे आवाहन जिल्हा प्रशासनातर्फे करण्यात आले आहे.
Discussion about this post