मुंबई । देशात सगळीकडे लोकसभा निवडणुकीची रणधुमाळी सुरु आहे. पहिल्या टप्प्यातील मतदान लवकरच होईल. परंतु राज्यातील महाविकास आघाडीत अजूनही जागा वाटपावरुन एकमत झालेले नाही. मुंबईच्या जागांचा तिढा अजूनही कायम आहे. दरम्याम, महायुतीच्या उमेदवारांना तगडी फाईट देण्यासाठी महाविकासआघाडी एकमेकांच्या जागा मागत आहेत. तर दुसरीकडे महायुतीकडून दिग्गजांना रिंगणात उतरवण्याची तयारी सुरु आहे.
मुंबईतील काँग्रेसची उत्तर मुंबईची जागा मिळावी असं ठाकरे गटानं म्हटलं आहे. तर ठाकरे गटाची मुंबई दक्षिण मध्यची जागा काँग्रेसला द्यावी अशी मागणी वर्षा गायकवाड यांनी केली आहे. एकीकडे मुंबईच्या जागेवरून मविआत तिढेची शक्यता असताना तर दुसरीकडे महायुतीही मविआच्या उमेदवारांविरोधात मुंबईत दिग्गजांना उतरवण्याच्या तयारीत आहे.
उत्तर मुंबई हा भाजपचा बालेकिल्ला आहे. उत्तर मुंबईतून 2014 आणि 2019 मधून गोपाळ शेट्टी हे निवडून आले होते. दरम्यान त्यांचं तिकीट कापून पियूष गोयल यांना उमेदवारी देण्यात आली आहे. मात्र, पियूष गोयलांविरोधात काँग्रेसकडे भक्कम असा उमेदवार नसल्याची चर्चा रंगली आहे. त्यामुळे उत्तर मुंबईतून विनोद घोसाळकरांना उमेदवारी देण्यात यावी अशी स्थानिक ठाकरे गटाच्या नेत्यांची मागणी आहे. दक्षिण मध्य मुंबई, उत्तर पश्चिम मुंबईच्या जागेसाठी काँग्रेसनं कठोर भूमिका घेतली पाहिजे असं म्हणत वर्षा गायकवाडांनी आपली नाराजी व्यक्त केली आहे. दिल्लीतील हायकमांडसोबत यासंदर्भात चर्चा करणार असल्याचंही गायकवाड यांनी म्हटलं आहे.
आतच महायुतीही मविआच्या उमेदवारांविरोधात मुंबईत दिग्गजांना उतरवण्याच्या तयारीत आहे. उत्तर मध्य मुंबईतून पूनम महाजनांऐवजी भाजपकडून उज्वल निकम यांच्या नावाची चाचपणी सुरु आहे. दक्षिण मुंबईतून मिलिंद देवरांचं नाव सर्व्हेत पुढे आलंय. त्यामुळे ही जागा शिंदे गटाकडे जाण्याची शक्यता आहे. तर मुंबई उत्तर पश्चिमसाठी गजानन किर्तीकरांच्या जागी रवींद्र वायकरांच्या नावाची दोन दिवसात घोषणा होण्याची शक्यता आहे.
मुंबईतील जागावाटपावरून काँग्रेसमध्ये नाराजीचा सूर आहे. तर दुसरीकडे महायुतीकडून मविआला टक्कर देण्यासाठी दिग्गज नावांची चाचपणी सुरु आहे.
Discussion about this post