जळगाव । शहरातील नवीन बसस्थानक परिसरातून दुचाकी चोरी करणाऱ्या मालेगाव येथील तिघा संशयितांना जिल्हापेठ पोलिसांनी अटक केली. पोलिसांनी त्यांच्या ताब्यातून चोरीच्या दोन मोटारसायकली जप्त केल्या आहेत.
याबाबत असे की, काही दिवसांपूर्वी जळगाव शहरातील नवीन बसस्थानक परिसरातून एका नागरिकाची हिरो होंडा स्प्लेंडर (MH १९ BS १५७३) ही मोटारसायकल चोरीला गेली होती. याप्रकरणी जिल्हापेठ पोलीस ठाण्यात गुन्हा दाखल करण्यात आला होता. तपासादरम्यान पोलिसांनी तांत्रिक विश्लेषणासह गुप्त माहितीच्या आधारे संशयितांचा माग काढत त्यांना ताब्यात घेतले.
पोलिसांनी मलीक अल्ताफ अहमद अन्सारी, मोहम्मद मुज्जमील अब्दुल खालक आणि अबुबकर नईम कौसर (सर्व रा. मालेगाव) यांना अटक करून त्यांची सखोल चौकशी केली. चौकशीदरम्यान आरोपींनी धक्कादायक खुलासा करत नाशिक येथून टीव्हीएस रायडर (MH १५ JF ३६०९) ही मोटारसायकल चोरी केल्याची कबुली दिली.
या मोटारसायकलवरून ते जळगाव शहरात आले. येथे त्यांनी ती गाडी एका व्यक्तीला विकण्याचे आमिष दाखवले आणि नंतर नवीन बसस्थानक परिसरातून हिरो होंडा स्प्लेंडर चोरी करून ती घेऊन मालेगावकडे पळ काढल्याचेही त्यांनी कबूल केले.दरम्यान, पोलिसांनी आरोपींकडून दोन्ही चोरीच्या मोटारसायकली जप्त केल्या असून या प्रकरणाचा पुढील तपास सुरू आहे.
यांनी केली कारवाई?
ही कारवाई जळगावचे पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते आणि उपविभागीय पोलीस अधिकारी नितीन गणापुरे यांच्या मार्गदर्शनाखाली करण्यात आली. प्रभारी अधिकारी अनिल वाघ यांच्या नेतृत्वाखाली पीएसआय शांताराम देशमुख, संतोष सोनवणे, महेश महाजन व इतर पोलिस कर्मचाऱ्यांनी ही कारवाई यशस्वी केली.
Discussion about this post