जळगावात केवायसीसाठी १०० रुपयांची लाच घेताना महिलेला अटक

जळगाव | महाराष्ट्र इमारत व इतर बांधकाम कल्याणकारी मंडळांतर्गत राबविण्यात येणाऱ्या गृह उपयोगी संच वाटप योजनेत १०० रुपये लाचेची मागणी करणाऱ्या जळगावातील महिला लोकसेवकाला लाचलुचपत प्रतिबंधक विभागाने रंगेहाथ पकडले. या कारवाईने खळबळ उडाली

आसमा परवीन शेख इरफान (वय ३८, रा. शिवाजीनगर) असे अटक करण्यात आलेल्या महिलेचे नाव आहे. तक्रारदाराने दिलेल्या माहितीनुसार, गृह उपयोगी वस्तूंचा संच मिळवून देण्यासाठी संबंधित महिलेने केवायसी प्रक्रियेच्या नावाखाली १०० रुपयांची मागणी केली होती.

तक्रारीची पडताळणी केल्यानंतर लाचलुचपत प्रतिबंधक विभागाने बुधवारी चिंचोली येथील संच वाटप केंद्रावर सापळा रचला. तक्रारदाराकडून लाचेची रक्कम स्वीकारताना आसमा शेख हिला पथकाने रंगेहाथ ताब्यात घेतले. तिच्याकडून लाचेच्या रकमेसह एकूण ४९,२५० रुपयांची रोकड हस्तगत करण्यात आली आहे.

याप्रकरणी एमआयडीसी पोलिस ठाण्यात गुन्हा दाखल करण्यात आले आहे. ही कारवाई नाशिक परिक्षेत्राचे पोलिस अधीक्षक भारत तांगडे, अपर पोलिस अधीक्षक माधव रेड्डी, सुनील दोरगे यांच्या मार्गदर्शनाखाली पोलिस उपअधीक्षक योगेश ठाकूर, पोलिस निरीक्षक रेश्मा अवतारे, स्मिता नवघरे आणि त्यांच्या पथकाने केली.