जळगाव । अघोरी विद्या, करणी बाधा दूर करण्याचे आणि गुप्त धन मिळवून देण्याचे आमिष दाखवत एका महिला ग्राफिक डिझायनरची तब्बल ११ ते १२ लाख रुपयांची फसवणूक केल्याचा धक्कादायक प्रकार जळगाव शहरात उघडकीस आला आहे. या प्रकरणी भोंदूबाबा आणि त्याच्या पोलिस कर्मचारी पत्नीविरुद्ध २०२२ मध्ये गुन्हा दाखल करण्यात आला असला तरी साडेतीन ते चार वर्षे उलटूनही दोन्ही आरोपी अद्याप पोलिसांच्या हाती लागलेले नाहीत.
पीडित महिला आणि आरोपी महिला या कॉलेजपासून एकमेकींच्या परिचयातील होत्या. घरगुती वादाच्या पार्श्वभूमीवर पीडित महिलेने मैत्रिणीकडे मदत मागितली असता, तिच्या पतीकडे अलौकिक शक्ती असल्याचे सांगून समस्येवर उपाय करण्याचे आश्वासन देण्यात आले. त्यानंतर संबंधित भोंदूबाबाने ‘अंगात पीर बाबा येतात’ असा आव आणत विविध अघोरी विधी सुरू केले आणि घरावर करणी झाल्याची भीती दाखवत सुरुवातीला लहान रक्कम घेतली.
यानंतर आरोपींनी ‘गुप्त धन’ मिळवून देण्याचे आमिष दाखवत वेळोवेळी लाखो रुपये उकळले. ही रक्कम रोख तसेच ऑनलाईन व्यवहारांद्वारे घेतली गेली. फसवणुकीचा भाग म्हणून आरोपींनी पीडित महिलेसह तिच्या कुटुंबाला देशातील विविध धार्मिक स्थळांवर नेऊन पूजा-विधी करण्याच्या नावाखाली मोठी रक्कम घेतली. जळगावात परतल्यानंतरही आरोपी दाम्पत्याने पीडित महिलेच्या घरी मुक्काम करून वारंवार पैशांची मागणी सुरूच ठेवली.
दरम्यान, पीडित महिलेने पैसे परत मागितले असता आरोपीने गंभीर धमकी देत “पैसे मागितल्यास तुमच्या सात पिढ्यांचा नाश करेन” असे सांगितल्याचा आरोप आहे. या प्रकरणी गुन्हा दाखल झाल्यानंतर पोलिसांनी आरोपींचा शोध घेण्याचे प्रयत्न सुरू ठेवले असले तरी ते अद्याप फरार आहेत.
गुन्हा दाखल होऊन अनेक वर्षे उलटूनही आरोपी अटकेत नसल्याने पीडित महिलेने अलीकडेच पोलिस अधीक्षकांची भेट घेत आरोपींना लवकरात लवकर अटक करून आपली फसवणूक झालेली रक्कम परत मिळवून देण्याची मागणी केली आहे. तसेच आरोपी महिला पोलिस कर्मचारी असल्यामुळे तपासात विलंब होत असल्याचा आरोपही तिने केला आहे.
Discussion about this post