जळगाव । जुन्या जळगाव भागातील कुढापा चौक परिसरात रविवारी (१५ फेब्रुवारी) सकाळी घडलेल्या भीषण आगीच्या घटनेने परिसरात एकच खळबळ उडाली. एका राहत्या घरात घरगुती गॅस सिलिंडरचा स्फोट होऊन लागलेल्या आगीत सलग तीन घरे पूर्णपणे जळून खाक झाली. या दुर्घटनेत सुदैवाने कोणतीही जीवितहानी झाली नाही; मात्र तीन कुटुंबांचा संसार डोळ्यांसमोर राख झाला.
मिळालेल्या प्राथमिक माहितीनुसार, कुढापा चौकातील निलेश शंकर शिरसाट आणि बापू शंकर शिरसाट यांच्या घरातून आगीची सुरुवात झाली. विद्युत शॉर्टसर्किटमुळे प्रथम ठिणगी पडून आग लागल्याचा अंदाज व्यक्त केला जात आहे. काही क्षणांतच घरातील गॅस सिलिंडरचा भीषण स्फोट झाला आणि आगीने विक्राळ रूप धारण केले. लाकडी पार्टिशनची घरे असल्याने ज्वाळा झपाट्याने पसरल्या आणि शेजारील घरांनाही आगीने कवेत घेतले.
या आगीत घरातील फर्निचर, कपडे, घरगुती साहित्य, कपाटात ठेवलेली रोख रक्कम, सोन्याचे दागिने तसेच महत्त्वाची कागदपत्रे जळून खाक झाली. काही मिनिटांतच संपूर्ण घर भस्मसात झाल्याचे दृश्य पाहून कुटुंबीयांना मोठा धक्का बसला. स्थानिक नागरिकांनी तत्काळ मदतीसाठी धाव घेतली; मात्र आगीची तीव्रता इतकी होती की सुरुवातीला ती नियंत्रणाबाहेर गेली होती.
अग्निशमन दलाचे शर्थीचे प्रयत्न
घटनेची माहिती मिळताच जळगाव महानगरपालिकेच्या अग्निशमन विभागाचे पाच बंब घटनास्थळी दाखल झाले. परिसरातील अरुंद रस्ते आणि वाढती आग यामुळे जवानांना सुरुवातीला अडचणींचा सामना करावा लागला. मात्र सलग प्रयत्नांनंतर आग आटोक्यात आणण्यात यश आले. वेळेत आग नियंत्रणात आल्याने मोठी जीवितहानी टळली.
Discussion about this post