जळगाव । शहरातील MIDC पोलीस स्टेशन हद्दीत एक अत्यंत धक्कादायक आणि संतापजनक घटना उघडकीस आली आहे. दारू पिण्यासाठी ५०० रुपयांची मागणी करून, पैसे न दिल्याच्या रागातून एका महिलेच्या डोक्यात दगड मारून तिला गंभीर जखमी केल्याची घटना तांबापुरा मच्छी बाजार परिसरात घडली. या घटनेमुळे शहरात एकच खळबळ उडाली आहे.
मिळालेल्या माहितीनुसार, युसूफ मुसा खटीक (वय ६४, रा. तांबापुरा) यांची पत्नी सलमाबी या २६ एप्रिल रोजी रात्री सुमारे ११ वाजेच्या सुमारास घराबाहेर पाणी भरत होत्या. त्यावेळी संशयित आरोपी मोहम्मद शेख मेहमुद याने त्यांच्याकडे दारू पिण्यासाठी ५०० रुपयांची मागणी केली. मात्र, सलमाबी यांनी पैसे देण्यास नकार दिल्यानंतर आरोपी संतापला.
या रागातून आरोपीने जवळच पडलेला दगड उचलून सलमाबी यांच्या डोक्यात मारला. या हल्ल्यात त्या गंभीर जखमी झाल्या. एवढ्यावरच न थांबता आरोपीने फिर्यादी युसूफ खटीक यांच्या खिशातील ५०० रुपये जबरदस्तीने हिसकावून नेल्याचेही समोर आले आहे.
घटनेनंतर जखमी महिलेला तातडीने रुग्णालयात उपचारासाठी दाखल करण्यात आले. मात्र, हा वाद इथेच थांबला नाही. २७ एप्रिल रोजी मध्यरात्री साडेबारा वाजेच्या सुमारास आरोपीचे वडील मेहमुद शेख मेहबूब यांनी रुग्णालयाबाहेर येऊन युसूफ खटीक यांना जीवे मारण्याची धमकी दिल्याची तक्रार करण्यात आली आहे. या प्रकरणी युसूफ खटीक यांनी दिलेल्या फिर्यादीवरून MIDC पोलीस स्टेशन येथे गुन्हा दाखल करण्यात आला असून पुढील तपास पोलीस उपनिरीक्षक अशोक काळे करीत आहेत.
Discussion about this post