हिमाचल प्रदेशमधील कुल्लू जिल्हा येथे भीषण रस्ते अपघात घडला असून २२ प्रवाशांना घेऊन जाणारी बस खोल दरीत कोसळली. हा अपघात कुल्लूजवळील सोझा परिसरात रात्री उशिरा घडल्याची माहिती समोर आली आहे.
या दुर्घटनेत ४ जणांचा मृत्यू झाला असून त्यामध्ये २ पुरुष आणि २ महिलांचा समावेश आहे. बसमधील उर्वरित १८ प्रवाशांना बचाव पथकांनी सुरक्षित बाहेर काढले असून सर्व जखमींना बंजार येथील सरकारी रुग्णालयात उपचारासाठी दाखल करण्यात आले आहे.
प्राथमिक माहितीनुसार, चालकाचे नियंत्रण सुटल्यामुळे ही बस रस्त्यावरून घसरून थेट दरीत कोसळली. अपघाताची माहिती मिळताच प्रशासन, पोलीस, महसूल विभाग, अग्निशमन दल आणि आरोग्य विभागाने संयुक्तपणे रात्रभर बचावकार्य राबवले. स्थानिक नागरिकांनीही तत्काळ मदतीसाठी धाव घेत बचावकार्याला हातभार लावला.
कुल्लूचे जिल्हा दंडाधिकारी अनुराग चंदर शर्मा यांनी सांगितले की, अपघातग्रस्तांची ओळख पटवण्याचे काम सुरू असून शोधमोहीम अद्याप सुरू आहे. जखमींना सर्वोत्तम उपचार देण्यावर प्रशासनाचा भर आहे. तसेच मृतांच्या नातेवाईकांशी संपर्क साधण्याचे प्रयत्नही सुरू असल्याची माहिती त्यांनी दिली. या दुर्दैवी घटनेमुळे परिसरात हळहळ व्यक्त केली जात असून, प्रशासन परिस्थितीवर बारकाईने लक्ष ठेवून आहे.
Discussion about this post