अकोला | राज्याच्या राजकारणात खळबळ उडवून देणारी एक बातमी समोर आलीय. अकोला जिल्ह्यातील मोहाळा गावात काँग्रेसचे प्रदेश उपाध्यक्ष हिदायत पटेल यांच्यावर राजकीय वादातून जीवघेणा चाकू हल्ला झाला होता. मात्र रुग्णालयात उपचारादरम्यान त्यांचे निधन झाले. याप्रकरणी अकोट ग्रामीण पोलीस स्टेशनमध्ये पाच जणांविरोधात गुन्हा दाखल करण्यात आला आहे.
त्यामध्ये हिदायत पटेल हल्ला प्रकरणातील आरोपींमध्ये अजित पवार गटाचे जिल्हाध्यक्ष मोहम्मद बुद्रूजम्मा, अकोटचे माजी काँग्रेस नगराध्यक्ष संजय बोडखे आणि काँग्रेस नेते अन जिल्हा परिषदेचे माजी सभापती राजीव बोचे यांच्या नावाचा समावेश.
मिळालेल्या माहितीनुसार, हिदायत पटेल हे मोहाळा गावात असताना एका व्यक्तीने त्यांच्यावर अचानक हल्ला केला. आरोपीने चाकूने पटेल यांच्या पोटात आणि मानेवर दोन ते तीन गंभीर वार केले. हल्ल्यानंतर मोठ्या प्रमाणात रक्तस्त्राव झाल्याने पटेल जागीच कोसळले.
यानंतर गंभीर जखमी असलेल्या हिदायत पटेल यांना अकोटमधील एका खासगी रुग्णालयात उपचारासाठी दाखल करण्यात आले होते. मात्र हल्ल्यात त्यांची प्रकृती गंभीर असल्याचे डॉक्टरांनी सांगितलं आणि उपचारादरम्यान आज त्यांची प्राणज्योत मालवली आहे. गुन्ह्यात मोठ्या राजकीय नेत्यांची नावे असल्याने अकोला जिल्ह्याच्या राजकारणात मोठी खळबळ उडाली आहे. अकोट ग्रामीण पोलिसांत 5 आरोपींवर गुन्हे दाखल आहेत. हिदायत पटेल यांचा मृत्यू झाल्यानंतर खुनाचे गुन्हे दाखल होतात का? याकडे लक्ष लागलं आहे.
Discussion about this post