सरकारी कर्मचाऱ्यांसह पेन्शनधारकांना गुडन्यूज ! दिवाळीआधी पगारात आणि पेन्शनमध्ये होणार वाढ

मुंबई । तुम्हीही सरकारी कर्मचारी आणि पेन्शनधारक असाल तर तुमच्यासाठी खुशखबर आहे. दिवाळीआधी केंद्र सरकार कर्मचारी आणि पेन्शनधारकांना मोठी भेट देण्याच्या तयारीत आहे. महागाई भत्ता (DA) आणि महागाई सवलत (DR) मध्ये लवकर पुन्हा एकदा बंपर वाढ होणार शक्यता असून ज्याचा फायदा देशभरातील 1.2 कोटींहून अधिक कर्मचारी आणि पेन्शनधारकांना होईल.

सरकार सध्या आठवा वेतन आयोग लागू करण्याच्या तयारीत आहे. केंद्र सरकार दिवाळीच्या अगदी आधी ऑक्टोबरच्या पहिल्या आठवड्यात महागाई भत्ता वाढवू शकते. दरवर्षी दोनदा महागाई भत्ता वाढतो. आता सरकार जुलै ते डिसेंबर या काळातील महागाई भत्ता वाढवण्याची घोषणा करु शकते. यावेळी महागाई भत्ता ३ टक्के वाढण्याची शक्यता आहे. जर महागाई भत्त्यात ३ टक्क्यांनी वाढ झाली तर एकूण महागाई भत्ता ५८ टक्के होऊ शकतो. सध्या महागाई भत्ता हा ५५ टक्के आहे.यामुळे लाखो कर्मचाऱ्यांना आणि पेन्शनधारकांना फायदा होणार आहे.

कर्मचारी आणि पेन्शनधारकांना तीन महिन्यांची थकबाकी देखील मिळेल, जी ऑक्टोबरच्या पगारासह दिली जाण्याची अपेक्षा आहे, असे फायनान्शियल एक्सप्रेसच्या अहवालात म्हटले आहे.

पेन्शन वाढणार
महागाई भत्ता हा तुमच्या बेसिक सॅलरीवर दिला जातो. त्यामुळे प्रत्येक कर्मचाऱ्यासाठी महागाई भत्ता वेगवेगळा वाढतो. जर तुमची पेन्शन ९००० रुपये असेल तर त्यावर ५५ टक्के महागाई भत्ता म्हणजे ४,९५० रुपये मिळतात. म्हणजे तुम्हाला १३,९५० रुपये पेन्शन मिळते. आता यात वाढ झाली तर महागाई भत्ता ५,२२० रुपये होईल. यामुळे पेन्शन १४,२२० रुपये होणार आहे.

पगारात वाढ
जर तुमची बेसिक सॅलरी १८००० रुपये असेल तर सध्या त्यावर ५५ टक्के महागाई भत्ता मिळतो. म्हणजेच एकूण ९,९०० रुपये मिळणार आहे. यामुळे पगार २७,९०० रुपये मिळणार आहे. दरम्यान, आता महागाई भत्त्यात वाढ झाली तर तुम्हाला १०,४४० रुपये मिळणार आहे. म्हणजेच तुम्हाला २८,४४० रुपये मिळणार आहेत.