जळगाव । राज्यात नगरपरिषद आणि नगरपालिका निवडणुकीच्या पार्श्वभूमीवर राजकारण पेटलं असून सत्ताधारी आणि विरोधी पक्षातील नेत्यांकडून उमेदवारांसाठी सभा घेतल्या जात असून त्यातून एकमेकांवर निशाणा साधला जात आहे. अशातच भाजप नेते मंत्री गिरीश महाजन यांनी यांनी शरद पवार गटाचे आमदार रोहित पवार यांच्यावर टीकास्त्र सोडले आहे.
जनतेची कामे करत असल्याने आम्ही इतकी वर्षे निवडून येत आहोत. आजपर्यंत कधीच सत्तेसाठी दादागिरी केली नाही. आमदार रोहित पवार आजोबांच्या मांडीवर, कडेवर बसून पहिल्यांदा आमदार झाले होते. दुसऱ्यांदा काकांनी (अजित पवार) दुर्लक्ष केल्याने त्यांचा पोस्टल मतांवर जेमतेम विजय झाला. आणि आता ते आम्हाला अक्कल शिकवायला निघाले आहेत, असा टोला गिरीश महाजन यांनी आमदार रोहित पवार यांना हाणला.
भाजपच्या वतीने जिल्ह्यातील नगर परिषदांच्या निवडणुकीतील नगराध्यक्ष तसेच नगरसेवकपदाच्या उमेदवारांसाठी मुख्यमंत्री देवेंद्र फडणवीस यांची जाहीर सभा भुसावळमध्ये सोमवारी आयोजित करण्यात आली होती. त्या ठिकाणी बोलताना मंत्री गिरीश महाजन यांनी आमदार रोहित पवार यांना लक्ष्य केले. जामनेरमध्ये नगर परिषद निवडणुकीसाठी अर्ज माघारीच्या अखेरच्या दिवशी मोठा गोंधळ झाला. एका उमेदवाराला भाजपचे पदाधिकारी व कार्यकर्ते बळजबरी माघारीसाठी पकडून आणत असल्याची चित्रफित सगळीकडे फिरली. त्यानंतर भाजपवर विरोधकांकडून सडकून टीका केली जात असताना, शरद पवार गटाचे युवा नेते आमदार रोहित पवार यांनीही मंत्री महाजन यांच्यावर समाज माध्यमावर टिकास्त्र सोडले होते. तसेच नैतिक जबाबदारी स्वीकारून मंत्री महाजन यांनी तातडीने राजीनामा द्यावा, अशीही मागणी आमदार पवार यांनी केली होती.
Discussion about this post