धुळे: रात्रीच्या वेळी महामार्गालगतचे पेट्रोल पंप किती असुरक्षित आहेत, हे पुन्हा एकदा सिद्ध करणारी एक धक्कादायक घटना धुळ्यात घडली आहे. धुळे च्या शिरपूर तालुक्यातील दहिवद येथे पेट्रोल पंपावर चार दरोडेखोरांनी पिस्तुलाचा धाक दाखवत 22 हजार रुपयांची रोकड लुटल्याचे समोर आले आहे. ही घटना CCTV मध्येकैद झाली असून या घटनेने परिसरात एकच खळबळ उडाली आहे.
मिळालेल्या माहितीनुसार, शिरपूर तालुक्यातील दहिवद गावाजवळ असलेल्या सदाशिव पेट्रोल पंपावर पहाटेच्या सुमारास ही घटना घडली. चार संशयित एकाच दुचाकीवर येऊन पेट्रोल पंपावर पोहोचले. त्यापैकी दोघांच्या हातात पिस्तुल होते. पंपावर ड्युटीवर असलेले कर्मचारी सोमनाथ गवळी, सुनील नगराळे व संतोष नगराळे यांना पिस्तुलाचा धाक दाखवून पैशांची मागणी करण्यात आली. कर्मचाऱ्यांनी प्रतिकार करण्याचा प्रयत्न करताच संशयितांनी त्यांना मारहाण केली. त्यानंतर रोकड भरलेली बॅग हिसकावून घेऊन चौघेही आरोपी दुचाकीवरून पसार झाले.
शिरपूर तालुक्यात दहिवद येथील एका पेट्रोल पंपावर पहाटेच्या वेळी तोंडाला रुमाल बांधलेल्या चार अज्ञात व्यक्तींनी शस्त्राचा धाक दाखवत कर्मचाऱ्यांकडून रोख रक्कम लुटून नेल्याचा धक्कादायक प्रकार घडला आहे. pic.twitter.com/XNH9TP6JkG
— Times Now Batmya (@timesnowbatmya) October 6, 2025
दरोडेखोरांचे संपूर्ण कृत्य सीसीटीव्ही कॅमेऱ्यात कैद
दरोडेखोरांनी चेहऱ्यावर कापड गुंडाळलेले असल्यामुळे त्यांची ओळख स्पष्टपणे पटली नाही. घटनेच्या वेळी पेट्रोल पंपाच्या शेजारील हॉटेल बंद होते. तसेच सुरक्षा रक्षक रजेवर होता. याचाच फायदा घेत दरोडेखोरांनी ही धाडसी चोरी केली असल्याचा पोलिसांचा प्राथमिक अंदाज आहे. घटनेची माहिती पेट्रोल पंपाचे संचालक तरुण शर्मा यांनी तातडीने पोलिसांना दिली. पोलिस निरीक्षक जयपाल हिरे यांनी घटनास्थळी तातडीने धाव घेऊन पंचनामा केला. दरम्यान, दरोडेखोरांचे संपूर्ण कृत्य सीसीटीव्ही कॅमेऱ्यात कैद झाले असून, पोलिसांनी फुटेजच्या आधारे आरोपींचा शोध सुरू केला आहे. मात्र या घटनेने परिसरात भीतीचं वातावरण पसरलं आहे.
Discussion about this post