जळगाव । जळगाव जिल्ह्यातील पशुपालक शेतकऱ्यांना काहीअंशी दिलासा देणारी बातमी समोर आलीय. जिल्हा सहकारी दूध उत्पादक संघाने नुकताच गाय दूध खरेदीदरात वाढ करण्याचा निर्णय घेतला आहे. या निर्णयामुळे जिल्ह्यातील हजारो दूध उत्पादक शेतकऱ्यांना दिलासा मिळणार आहे. खरेदीदरातील वाढ सणासुदीच्या काळात त्यांच्यामध्ये चैतन्य निर्माण करेल, असे दूध संघाच्या प्रशासनाने म्हटले आहे.
जळगाव जिल्हा सहकारी दूध उत्पादक संघाने गायीच्या दूध खरेदीदरात एक रुपयांनी वाढ करण्याचा निर्णय घेतला आहे. परिणामी, पशुपालक शेतकऱ्यांना आता ३.५ फॅट (स्निग्धांश) आणि ८.५ टक्के एसएनएफ (स्निग्धेतर घटक) दर्जाच्या दुधाला प्रति लिटर ३५ रूपये खरेदीदर मिळणार आहे.
त्यानुसार दूध उत्पादक शेतकऱ्यांना नवीन खरेदीदर अदा करण्यात यावे, असे गावोगावच्या प्राथमिक सहकारी दूध उत्पादक संस्थांना जिल्हा सहकारी संघाकडून सूचित करण्यात आले आहे. या संदर्भात अधिकृत दर पत्रक लवकरच जाहीर करण्यात येणार आहे.
जिल्हा सहकारी दूध उत्पादक संघाने गायीच्या दुधाचे खरेदीदर वाढवले असले, तरी म्हशीच्या दुधाचे खरेदीदर मात्र जैसे थे ठेवले आहेत. सध्या म्हशीच्या ६.० फॅट (स्निग्धांश) आणि ९.० टक्के एसएनएफ (स्निग्धेतर घटक) दर्जाच्या दुधाला प्रति लिटर आठ रूपये २५ पैसे खरेदीदर दिला जात आहे, असे जिल्हा दूध संघातील संकलन विभागाच्या सूत्रांनी सांगितले.
Discussion about this post