चाळीसगावातील तितूर नदीपात्रात अपंग तरुणाने घेतली उडी; शोधमोहीम सुरू !

चाळीसगाव । चाळीसगाव शहरातून एक धक्कादायक बातमी समोर आलीय. ज्यात तितूर नदीपात्रात एका अपंग तरुणाने उडी घेतल्याची घटना समोर आली आहे. गोविंदा बुधा पवार (वय ४४) असे नदीपात्रात उडी घेणाऱ्या तरुणाचे नाव असून घटनेनंतर नगरपालिकेच्या आपत्ती व्यवस्थापन पथकाने तातडीने घटनास्थळी धाव घेत शोधमोहीम सुरू केली. मात्र, अद्याप तरुणाचा शोध लागला नाही.

गोविंदा पवार हा आपल्या कुटुंबासोबत भाजी मंडईत बाजारासाठी आला होता. बाजाराच्या कामानिमित्त झाडू विक्री करणाऱ्या स्टॉलजवळ पुलावर बसलेला असताना त्याने अचानक नदीत उडी घेतली. अपंगत्वामुळे त्याला पोहता येत नसल्याने काही क्षणांतच तो प्रवाहात बुडाला.

या तरुणाने तितूर नदीपात्रात नेमकी कशासाठी उडी घेतली, याचे नेमके कारण अद्याप समजू शकलेले नाही. मात्र, या घटनेमुळे नदीकाठी मोठी गर्दी झाली होती. घटनेची माहिती मिळताच, रात्री उशिरापर्यंत बोटीच्या साहाय्याने संपूर्ण नदीपात्रात शोध मोहीम राबवली. अंधार आणि नदीतील पाण्याचा प्रवाह यामुळे शोधकार्यात अडथळे येत होते, तरीही शोधकार्य युद्धपातळीवर सुरू होते. मात्र, रात्री उशिरापर्यंत गोविंदा पवार यांचा शोध लागलेला नव्हता.

दरम्यान, भाजपच्या खासदार स्मिता वाघ यांनीही घटनास्थळी धाव घेतली. त्यांनी नदीपात्रातील शोधकार्याची पाहणी केली आणि प्रशासकीय अधिकाऱ्यांकडून घटनेची माहिती घेतली. खासदार वाघ यांनी कुटुंबाला धीर दिला. प्रशासनाने ही शोधमोहीम पुढील दिवसही सुरू ठेवावी आणि संबंधित व्यक्तीचा शोध घ्यावा, असे निर्देश दिले आहेत.