धुळे । शिरपूर तालुक्यात गव्हाच्या बियाण्यांच्या शासकीय अनुदानासाठी शेतकऱ्यांची यादी प्रमाणित करण्याकरिता ५ हजार रुपयांची लाच मागितल्याप्रकरणी तालुका कृषी अधिकारी आणि डेटा एन्ट्री ऑपरेटरविरोधात गुन्हा दाखल करण्यात आला आहे.
शिरपूर तालुक्यातील बभळाज येथील शासनमान्य बी-बियाणे व खत विक्री करणाऱ्या व्यापाऱ्याने लाचलुचपत प्रतिबंधक विभागाकडे तक्रार दिल्यानंतर ही कारवाई करण्यात आली. संबंधित व्यापाऱ्याच्या दुकानातून महाराष्ट्र राज्य बियाणे महामंडळ मर्यादित, अकोला यांच्या माध्यमातून ‘कृषी उन्नती योजना राष्ट्रीय अन्न सुरक्षा आणि पोषण अभियान’ अंतर्गत गव्हाचे प्रमाणित बियाणे वितरित करण्यात आले होते.
सन २०२५-२०२६ मध्ये ९० शेतकऱ्यांना अनुदान वजा करून गव्हाचे बियाणे विक्री करण्यात आले होते. या विक्रीवरील १ लाख ४० हजार रुपयांचे शासकीय अनुदान मिळण्यासाठी आवश्यक कागदपत्रे तालुका कृषी कार्यालयात सादर करण्यात आली होती. कागदपत्रे जमा केल्यानंतर डेटा एन्ट्री ऑपरेटर सुनील पाटील यांनी शेतकऱ्यांची यादी प्रमाणित करण्यासाठी तालुका कृषी अधिकारी संजय पवार यांच्यासाठी ५ हजार रुपये द्यावे लागतील, अशी मागणी केल्याचे तक्रारीत नमूद आहे.
तक्रारदाराने लाचलुचपत प्रतिबंधक विभाग, धुळे येथे तक्रार दाखल केली. उपअधीक्षक सचिन साळुंखे यांच्या पथकाने पडताळणी केली असता लाच मागणीची खात्री झाली. सापळा कारवाईदरम्यान सुनील पाटील यांना ५ हजार रुपयांची लाच स्वीकारताना रंगेहात पकडण्यात आले. तसेच या लाच मागणीस तालुका कृषी अधिकारी संजय पवार यांनी दुजोरा दिल्याचेही निष्पन्न झाले. या प्रकरणी दोघांविरुद्ध गुन्हा दाखल करण्यात आला असून पुढील तपास सुरू आहे.
Discussion about this post