बोदवड | जेवण बनवून न दिल्याच्या कारणावरून मुलाने स्वतःच्या आईची निर्घृण हत्या केल्याची धक्कादायक घटना बोदवड तालुक्यातील येवती येथे उघडकीस आली आहे. झोपेत असलेल्या आईच्या डोक्यात लोणच्याची बरणी आणि लोखंडी खुरप्याने वार करून मुलाने तिचा जीव घेतल्याचा आरोप आहे. या घटनेमुळे परिसरात खळबळ उडाली असून, बोदवड पोलिसांनी संशयित आरोपी मुलाला अटक केली आहे.
जेवणावरून वाद, संतापातून टोकाचे पाऊल
मिळालेल्या माहितीनुसार, अलकाबाई पुरुषोत्तम वाघ (वय ६३) असे मृत महिलेचे नाव आहे. त्या बोदवड तालुक्यातील येवती येथे मुलगा गणेश पुरुषोत्तम वाघ याच्यासोबत राहत होत्या. आईने जेवण बनवून न दिल्याच्या कारणावरून गणेशच्या मनात राग निर्माण झाला होता.
याच रागातून त्याने झोपेत असलेल्या आईच्या डोक्यात लोणच्याची बरणी आणि लोखंडी खुरप्याने वार केले. या हल्ल्यात अलकाबाई यांचा मृत्यू झाला. आई-मुलाच्या नात्याला काळिमा फासणाऱ्या या घटनेने येवती परिसरात हळहळ व्यक्त केली जात आहे.
मुलाला अटक; पोलिसांकडून पुढील तपास
घटनेप्रकरणी बोदवड पोलीस ठाण्यात गणेश पुरुषोत्तम वाघ याच्याविरुद्ध खुनाचा गुन्हा दाखल करण्यात आला आहे. पोलिसांनी संशयित आरोपीला अटक केली असून, या प्रकरणाचा पुढील तपास सुरू आहे.
Discussion about this post