एकीकडे आगामी विधानसभा निवडणुकीच्या पार्श्वभूमीवर भाजपकडून जोरदार तयारी केली जात आहे. मात्र अशातच महाराष्ट्रातील काही नेत्यांनी इतर पक्षात प्रवेश केला. आता अशातच भाजपला आणखी मोठा धक्का बसला आहे. पश्चिम महाराष्ट्रातले भाजपचे दोन बडे नेते शरद पवार गटाच्या संपर्कात असल्याची माहिती आहे.
कोल्हापूरचे भाजपचे नेते समरजित घाटगे हे शरद पवार गटाच्या संपर्कात आहेत. समरजीत घाटगे यांचा शरद पवार गटात प्रवेश जवळपास निश्चित मानला जात आहे. तर पुणे जिल्ह्यातील इंदापूरचे भाजप नेते, माजी मंत्री हर्षवर्धन पाटील हे देखील शरद पवार गटाच्या संपर्कात आहेत, अशी माहिती सूत्रांनी दिली आहे.
हर्षवर्धन पाटील शरद पवार गटाच्या संपर्कात
भाजप नेते हर्षवर्धन पाटील यांना शरद पवार गटाकडून संपर्क केला गेल्याची माहिती सूत्रांनी दिली आहे. इंदापूर विधानसभा मतदारसंघात उमेदवारी देण्यासाठी शरद पवार गटाकडून चाचपणी सुरु असल्याची माहिती आहे. हर्षवर्धन पाटील यांची मात्र वेट आणि वॉचची भूमिका असल्याचं कळतं आहे. महायुतीत इंदापूरची जागा अजित पवार गटाला जाण्याची शक्यता आहे. महायुतीकडून हर्षवर्धन पाटील यांना अद्याप शब्द देण्यात आला नाही. गेल्या काही दिवसांपासून हर्षवर्धन पाटलांचे गावभेट दौरे सुरु आहेत. आज वाढदिवसानिमित्त हर्षवर्धन पाटील इंदापूर मतदारसंघात शक्तीप्रदर्शन करणार आहेत.
समरजीत घाटगेंचा पवार गटात प्रवेश जवळपास निश्चित
उद्या होणाऱ्या महायुतीच्या जाहीर सभेला देखील समरजित घाटगे उपस्थित राहणार नसल्याची देखील माहिती आहे. समरजीत घाटगे यांचा शरद पवार गटात प्रवेश जवळपास निश्चित असल्याचं बोललं जात आहे. सप्टेंबर महिन्याच्या पहिल्या किंवा दुसऱ्या आठवड्यात शरद पवार यांच्या उपस्थितीतच प्रवेश होणार असल्याची खात्रीलायक सूत्रांनी माहिती दिली आहे. मंत्री हसन मुश्रीफ यांच्या विरोधात उमेदवार देण्यासाठी शरद पवारांनी ही रणनिती आखल्याचं बोललं जात आहे.
Discussion about this post