मोठी बातमी! राज्यातील आणखी एक परीक्षा रद्द; क्लार्क पदाची टायपिंग टेस्ट पुन्हा होणार

मुंबई : महाराष्ट्रातून लिपिक पदाच्या परीक्षार्थींसाठी मोठी बातमी समोर आली आहे. मुंबई उच्च न्यायालयाने लिपिक पदासाठी घेण्यात आलेली टायपिंग स्किल टेस्ट रद्द करण्याचा निर्णय घेतला आहे. राज्यातील अनेक परीक्षा केंद्रांवर तांत्रिक अडचणी निर्माण झाल्याच्या तक्रारी उमेदवारांनी केल्यानंतर हा निर्णय घेण्यात आला आहे. आता या परीक्षेसाठी नव्याने अधिसूचना जारी करण्यात येणार असून, त्यानंतर परीक्षेच्या नवीन तारखा जाहीर केल्या जाणार आहेत.

अनेक केंद्रांवर तांत्रिक अडचणी

मुंबई उच्च न्यायालयातील लिपिक पदासाठी राज्यातील विविध केंद्रांवर टायपिंग स्किल टेस्ट घेण्यात आली होती. मात्र, कल्याण, छत्रपती संभाजीनगर, नांदेड, वाशिम, भंडारा यासह काही परीक्षा केंद्रांवर उमेदवारांना तांत्रिक समस्यांचा सामना करावा लागला.

काही केंद्रांवर सर्व्हर बंद पडणे, की-बोर्ड व्यवस्थित काम न करणे, कॉम्प्युटर अचानक लॉग आऊट होणे अशा तक्रारी उमेदवारांनी केल्या. त्यामुळे अनेक उमेदवारांना परीक्षा देताना अडचणी निर्माण झाल्या.

कल्याणमध्ये उमेदवारांचे आंदोलन

कल्याण आणि छत्रपती संभाजीनगरमधील काही परीक्षा केंद्रांवर परिस्थिती गंभीर झाल्यानंतर उमेदवारांनी आंदोलन केले. परीक्षा व्यवस्थित पार पडली नसल्याचा आरोप करत उमेदवारांनी परीक्षा पुन्हा घेण्याची मागणी केली होती.

कल्याणमधील एपीएमसी मार्केट येथील परीक्षा केंद्रावर ४०० हून अधिक उमेदवारांनी आंदोलन केले. स्थानिक प्रशासनानेही काही उमेदवार वेळेवर परीक्षा केंद्रावर पोहोचूनही तांत्रिक अडचणींमुळे त्यांना परीक्षा देता आली नसल्याचे लेखी स्वरूपात मान्य केले होते.

तब्बल ११ हजार उमेदवार परीक्षा देणार होते

ही टायपिंग टेस्ट महाराष्ट्रातील १९ परीक्षा केंद्रांवर घेण्यात येणार होती. त्यासाठी जवळपास ११ हजार उमेदवार परीक्षेला बसणार होते. परीक्षा घेण्यासाठी उच्च न्यायालयाकडून बाहेरील विक्रेते किंवा तृतीय पक्ष परीक्षा एजन्सीची मदत घेण्यात आली होती. परीक्षेदरम्यान निर्माण झालेल्या तांत्रिक अडचणींची चौकशी सुरू असल्याचे सांगण्यात आले होते.

मुंबई उच्च न्यायालयाच्या रजिस्ट्रारकडून रविवारी सायंकाळी उशिरा निवेदन जारी करण्यात आले होते. त्यात महाराष्ट्रातील परीक्षा एकूणच सुरळीत पार पडल्याचे सांगण्यात आले होते. मात्र, कल्याण आणि छत्रपती संभाजीनगरसह काही केंद्रांवर तांत्रिक अडचणींबाबत तक्रारी प्राप्त झाल्याचे मान्य करण्यात आले होते. आता उच्च न्यायालयाने टायपिंग स्किल टेस्ट रद्द करण्याचा निर्णय घेतल्याने उमेदवारांना नव्याने परीक्षा द्यावी लागणार आहे. नवीन अधिसूचना कधी जारी होणार आणि परीक्षा नेमकी कोणत्या तारखेला होणार, याकडे सुमारे ११ हजार उमेदवारांचे लक्ष लागले आहे.