अमळनेर । जळगाव जिल्ह्यातील अमळनेर तालुक्यातील जैतपिर गावाजवळ नवसासाठी जात असलेल्या भाविकांच्या पिकअप व्हॅनचा भीषण अपघात झाला असून या दुर्घटनेत ११ जण जखमी झाले आहेत. जखमींपैकी सहा जणांची प्रकृती गंभीर असल्याने त्यांना पुढील उपचारासाठी धुळे येथे हलवण्यात आले आहे. अपघाताची संपूर्ण घटना परिसरातील सीसीटीव्ही कॅमेऱ्यात कैद झाली आहे.
मिळालेल्या माहितीनुसार, शिंदखेडा तालुक्यातील वैजापूर येथील २० ते २५ भाविक पिकअप व्हॅनने नवस फेडण्यासाठी निघाले होते. अमळनेरच्या जैतपिर येथील वळणाजवळ असलेल्या गतिरोधकाजवळ समोरून अचानक ट्रक आल्याने चालकाचे वाहनावरील नियंत्रण सुटले. परिणामी व्हॅन उलटून सर्व प्रवासी रस्त्यावर कोसळले आणि अनेक जण जखमी झाले.
अपघातानंतर स्थानिक नागरिकांनी तातडीने मदत करत जखमींना रुग्णालयात दाखल केले. गंभीर जखमी झालेल्या सहा जणांना धुळे येथे उपचारासाठी रवाना करण्यात आले असून उर्वरित जखमींवर अमळनेर ग्रामीण रुग्णालयात उपचार सुरू आहेत. या घटनेमुळे परिसरात काही काळ भीती आणि खळबळ निर्माण झाली होती.
जखमींचे नाव ?
अंकुश भगवान बागुल (२०), राकेश प्रकाश मोरे (२०), बादल गुलाब भिल (१९), संजय बापू मोरे (२२), गणेश ताराचंद भिल (२१) – सर्व रा. वैजापूर आणि मेलसिंग जयसिंग कुवर (२२). या तरुणांच्या हात, पाय, पाठ आणि डोक्याला गंभीर दुखापत झाली आहे. तर विजय दिलीप पवार (२२), राकेश सुखराम भिल (२३), रोहित भिल (१८) तिन्ही रा. वैजापूर, नागेश मंगल भिल (२०, रा. जोयदा, ता. शिरपूर) आणि सनी श्याम भिल (१८, रा. माळीच, ता. शिरपूर) हे अमळनेर ग्रामीण रुग्णालयात उपचार घेत आहेत.
Discussion about this post