अमळनेर । अमळनेर तालुक्यातील पाडळसरे परिसरातील ३० वर्षीय विवाहितेला सोन्याचे दागिने करून देण्याचे आमिष दाखवून तिचे व तिच्या अल्पवयीन मुलाचे अपहरण केल्याची धक्कादायक घटना समोर आली आहे. त्यानंतर तिला डांबून ठेवत सुमारे दोन महिने तिच्यावर अत्याचार करण्यात आले. याप्रकरणी मारवड पोलिस ठाण्यात अपहरण व बलात्काराचा गुन्हा दाखल झाला असून, आरोपी सुदाम भगवान भिल्ल (कलाली, ता. अमळनेर) याला अटक करण्यात आली.
पीडित शेतमजूर महिला पतीने साथ सोडल्याने आई-वडिलांकडे राहत होती. तिच्याकडे लाडकी बहीण योजनेचे व मजुरीचे मिळून सुमारे ७० हजार रुपये असल्याची माहिती आरोपी सुदाम भगवान भिल्ल याला समजली.
सोन्याचे दागिने करण्यासाठी गरज पडल्यास आणखी पैसे देईन, असे सांगून त्याने पीडितेला अमळनेर येथे नेले. मात्र सोनार गल्लीत न नेता दुसऱ्याच वाहनात बसतून तिला व तिच्या मुलाला जीवे मारण्याची धमकी देत अपहरण केल्याचा आरोप आहे. त्यानंतर बहाळ व शिरपूरजवळील विमानतळ परिसरातील एका तांड्यावर अत्याचार केल्याचे फिर्यादीत म्हटले आहे. आरोपी बाहेर गेल्याची संधी साधून पीडितेने मुलासह तेथून पलायन केले. कमखेडा येथील बहिणीच्या घरी आश्रय घेत घडलेला प्रकार नातेवाइकांना सांगितल्यानंतर तिने मारवड पोलिस ठाण्यात तक्रार दाखल केली. उपविभागीय पोलिस अधिकारी विनायक कोते यांच्या मार्गदर्शनात सहायक पोलिस निरीक्षक साजिद मन्सुरी यांच्या पथकाने अटक केली.
Discussion about this post