पुणे । महाराष्ट्र राज्य माध्यमिक व उच्च माध्यमिक शिक्षण मंडळातर्फे फेब्रुवारी-मार्च २०२४ मध्ये घेण्यात येणाऱ्या बारावीच्या परीक्षेसाठी बसणाऱ्या विद्यार्थ्यांसाठी महत्वाची बातमी आहे. ती म्हणजेच बारावी बोर्डाच्या परीक्षेचे ऑनलाइन प्रवेशपत्र (हॉल तिकीट) सोमवारपासून (ता. 22) उपलब्ध होणार आहे. याबाबतची माहिती मंडळाने कळविली आहे. विद्यार्थ्यांना उच्च माध्यमिक शाळा आणि कनिष्ठ महाविद्यालयांमार्फत ही प्रवेशपत्र मिळणार असल्याचे मंडळाने स्पष्ट केले.
फेब्रुवारी-मार्च २०२४ साठी सर्व विभागीय मंडळाच्या कार्यकक्षेतील सर्व उच्च माध्यमिक शाळा, कनिष्ठ महाविद्यालयांनी बारावीच्या परीक्षेची ऑनलाइन प्रवेशपत्रे प्रिंट करून विद्यार्थ्यांना द्यावेत, अशी सूचना राज्य मंडळाने केली आहे.
प्रवेशपत्र ऑनलाइन पद्धतीने प्रिंटिंग करताना विद्यार्थ्यांकडून त्यासाठी कोणतेही वेगळे शुल्क घेऊ नये. प्रवेशपत्राची प्रिंट काढून त्यावर मुख्याध्यापकांनी, प्राचार्यांनी शिक्का मारून स्वाक्षरी करावी असेही मंडळाने स्पष्ट केले आहे.
प्रवेशपत्रात विषय व माध्यम बदल असतील तर त्यांच्या दुरुस्त्या महाविद्यालयांनी विभागीय मंडळात जाऊन करून घ्याव्यात. विद्यार्थ्यांकडून प्रवेशपत्र गहाळ झाल्यास संबंधित महाविद्यालयांनी पुन्हा प्रिंट काढून त्यावर लाल शाईने द्वितीय प्रत असा शेरा देऊन विद्यार्थ्यांना प्रवेशपत्र द्यावे, अशा सूचना राज्य मंडळाच्या सचिव अनुराधा ओक यांनी केल्या आहेत.
Discussion about this post