त्या वक्तव्यानंतर एकनाथ खडसेंनी मंत्री महाजनांना बजावली नोटीस

जळगाव : राष्ट्रवादीचे ज्येष्ठ नेते आमदार एकनाथ खडसे यांनी मंत्री गिरीश महाजनांवर मानहानीचा एक रुपयाचा दावा दाखल करण्याबाबत नोटीस बजावली आहे.

दोन आठवड्यांपूर्वी खडसेंना हृदयविकाराचा त्रास झाल्यानंतर एअर ॲम्बुलन्सने मुंबईला हलविण्यात येऊन बॉम्बे हॉस्पिटलमध्ये त्यांच्यावर ॲन्जिओग्राफी व ॲन्जिओप्लास्टी झाली होती. मात्र,याबाबत गिरीश महाजन यांनी खडसेंचा आजार खोटा, सोंग असल्याचे वक्तव्य केलं होते. त्याला उत्तर देण्यासाठी खडसेंनी पत्रकार परिषद घेऊन बॉम्बे हॉस्पिटलमध्ये त्यांचा आजार, त्यावरील उपचाराची कागदपत्रे सादर केली.

तसेच आपल्या आजारपणाबाबत शंका उपस्थित करणारे मंत्री गिरीश महाजन यांनी माझे चॅलेंज स्विकारावे व त्यानुसार वेळ, तारीख कळवावी तसेच त्यांच्या आरोपामुळे आपली मानहानी झाली असल्याचं खडसे म्हणाले. त्यामुळे त्यासाठी मंत्री महाजनांना वकिलांमार्फत एक रुपया अब्रुनुकसानीची नोटीस खडसेंनी बजावली.

“त्यांची किंमत धेल्याची आहे, त्यामुळे त्यांना एक रुपयाची नोटीस बजावली आहे”, असे मत एकनाथ खडसे यांनी मांडले आहे. आपला आजार खोटा निघाला तर आपण जोडे खाऊ अन्‌ खरा निघाल्यास महाजनांनी जोडे खायला तयार राहण्याचे आव्हान देखील खडसेंनी दिले आहे.