धक्कादायक ! राजस्थानात फिरायला गेलेल्या अमळनेर तालुक्यातील सहा जणांचा अपघातात मृत्यू

अमळनेर : दिवाळीच्या सुटीनिमित्त राजस्थानात फिरायला गेलेल्या अमळनेर तालुक्यातील सहा जणांना कंटेनरने कारला दिलेल्या धडकेत मृत्यू झाला. हा अपघात सोमवार, 13 रोजी दुपारी तीन वाजेच्या सुमारास घडला. सुरूवातीला या अपघातात पाच जण ठार झाले तर गंभीर जखमी असलेली महिला उपचारादरम्यान दगावली. अपघातात मयत झालेले सर्व सहा सदस्य मांडळ, ता.अमळनेरचे रहिवासी असून या अपघाताने गावावर शोककळा पसरली.

मांडळ येथील शिक्षक धनराज नागराज सोनवणे (55, रा.बेटावद) व योगेश धोंडू साळुंखे (34, अर्थे, ता.शिरपूर, रा.पिंपळे रोड, अमळनेर) या दोन्ही शिक्षकांचे कुटुंब वाहन (क्रमांक एम.एच.04-9114) ने राजस्थान येथे दोन चारचाकींद्वारे फिरायला गेले होते. सोमवार, 13 रोजी दुपारी पावणे तीन वाजता बाडमेर रस्त्यावरील धौरीमन्ना गावाजवळ एका कंटेनरने चारचाकीला धडक दिल्याने भीषण अपघातात धनराज सोनवणे, त्यांची पत्नी सुरेखा बाबुलाल मैराळे ऊर्फ सुरेखा धनराज सोनवणे (50), त्यांची मुलगी स्वरांजली धनराज सोनवणे (5), गायत्री योगेश साळुंखे (30), त्यांचा मुलगा प्रशांत योगेश साळुंखे (7) आणि मुलगी भाग्यलक्ष्मी साळुंखे (एक वर्ष) असे सहा जण ठार झाले.