जळगाव । सोने आणि चांदी खरेदी करण्याची इच्छा असलेल्या ग्राहकांसाठी सध्या आनंदाची बातमी आहे. गेल्या काही दिवसांपासून सराफा बाजारात दोन्ही मौल्यवान धातूंच्या किमतीत मोठी घसरण होत आहे. दिवाळीनंतर सुरू झालेली दरकपातीची मालिका अद्याप कायम असून, अवघ्या पंधरा दिवसांत सोन्याचे दर १२ हजार रुपयांनी, तर चांदीचे दर तब्बल २५ हजार रुपयांनी खाली आले आहेत.
जळगावच्या सराफा बाजारात आज जीएसटी वगळता सोन्याचा भाव प्रति १० ग्रॅम १ लाख ३० हजार ५०० रुपये, तर चांदीचा भाव प्रति किलो १ लाख ६४ हजार रुपये इतका आहे. विशेष म्हणजे, जानेवारी २०२६ पासून आतापर्यंतच्या दरांची तुलना केली असता सोन्याच्या किमतीत जवळपास ५० हजार रुपयांची, तर चांदीच्या दरात तब्बल २ लाख ५० हजार रुपयांची घसरण झाली आहे. त्यामुळे काही महिन्यांपूर्वी विक्रमी पातळीवर पोहोचलेल्या मौल्यवान धातूंचे दर आता मोठ्या प्रमाणात खाली आले आहेत.
खरेदीदारांसाठी संधी, गुंतवणूकदारांची चिंता वाढली
दरातील घसरणीमुळे दागिने खरेदी करणाऱ्या ग्राहकांना दिलासा मिळाला आहे. विशेषतः लग्नसराई आणि आगामी शुभकार्यांच्या पार्श्वभूमीवर सोने खरेदी करू इच्छिणाऱ्यांना कमी किमतीत खरेदी करण्याची संधी मिळत आहे. मात्र, या घसरणीचा दुसरा फटका गुंतवणूकदार आणि सराफा व्यावसायिकांना बसत आहे. वाढत्या किमतींच्या अपेक्षेने सोने-चांदीचा साठा केलेल्यांना सध्याच्या दरकपातीमुळे आर्थिक नुकसान सहन करावे लागत असल्याचे व्यापाऱ्यांकडून सांगण्यात येत आहे.
दर आणखी घसरणार की पुन्हा उसळी घेणार?
सोन्या-चांदीच्या किमतीतील ही घसरण कायमस्वरूपी नसून आगामी काळात पुन्हा दरवाढ होऊ शकते, असा अंदाज सोने व्यापारी सागर भंगाळे यांनी व्यक्त केला आहे. त्यामुळे सध्याच्या घसरणीनंतर ग्राहक खरेदीसाठी पुढे येतात का आणि सराफा बाजारात पुन्हा तेजी परतते का, याकडे सर्वांचे लक्ष लागले आहे. दरातील चढ-उतारांमुळे सध्या ग्राहक आणि गुंतवणूकदार दोघेही बाजाराच्या पुढील हालचालींकडे लक्ष ठेवून आहेत.















Discussion about this post