अमेरिकेतील विमानसेवा अचानक ठप्प झाल्याने खळबळ; हजारो प्रवासी विमानतळांवर अडकले, काही तासांत सेवा पूर्ववत

अमेरिका : अमेरिकेतील हवाई वाहतूक अचानक ठप्प झाल्याने मोठी खळबळ उडाली. देशभरातील विमानतळांवरून होणारी उड्डाणे काही काळासाठी पूर्णपणे थांबवण्यात आली. अचानक घेतलेल्या या निर्णयामुळे अमेरिकेतील विविध विमानतळांवर हजारो प्रवासी अडकले आणि विमान कंपन्यांच्या सेवांवरही मोठा परिणाम झाला.

फेडरल एव्हिएशन ॲडमिनिस्ट्रेशनने (FAA) एअर ट्रॅफिक कंट्रोल केंद्रांमध्ये निर्माण झालेल्या गंभीर तांत्रिक बिघाडामुळे हा निर्णय घेतल्याचे स्पष्ट केले. देशभरातील तब्बल २२ एअर ट्रॅफिक कंट्रोल केंद्रांवर दळणवळण प्रणालीमध्ये अडचणी निर्माण झाल्याने विमानांच्या हालचालींचे व्यवस्थापन करणे कठीण झाले होते.

एअर ट्रॅफिक कंट्रोल केंद्रांकडून विविध विमानतळांदरम्यान प्रवास करणाऱ्या विमानांना मार्गदर्शन केले जाते तसेच त्यांच्या उड्डाण आणि लँडिंगचे व्यवस्थापन केले जाते. मात्र, या केंद्रांमध्ये तांत्रिक समस्या निर्माण झाल्याने विमानांच्या सुरक्षिततेच्या दृष्टीने उड्डाणे थांबवण्याचा निर्णय घेण्यात आला.

दरम्यान, विमानसेवा अचानक बंद झाल्याने अमेरिकेवर मोठा सायबर हल्ला झाल्याची चर्चा सोशल मीडियावर सुरू झाली. 9/11 दहशतवादी हल्ल्यानंतर पहिल्यांदाच अमेरिकेतील विमानसेवा अशा प्रकारे मोठ्या प्रमाणावर थांबवण्यात आल्याची चर्चा झाल्याने या घटनेने आणखी गंभीर स्वरूप धारण केले.

मात्र, अमेरिकन प्रशासनाने सायबर हल्ल्याची शक्यता स्पष्टपणे फेटाळून लावली. विमानसेवा ठप्प होण्यामागे सायबर हल्ला नसून एअर ट्रॅफिक कंट्रोल प्रणालीतील तांत्रिक बिघाड कारणीभूत असल्याचे स्पष्ट करण्यात आले.

काही तासांच्या तांत्रिक अडचणीनंतर विमानसेवा पुन्हा सुरू करण्यात आली. मात्र, अचानक झालेल्या या व्यत्ययामुळे अनेक विमानांचे वेळापत्रक कोलमडले असून प्रवाशांना मोठ्या गैरसोयीला सामोरे जावे लागले.