नंदूरबार : जिल्हा परिषद निवडणुकांच्या पार्श्वभूमीवर महायुतीतील अंतर्गत मतभेद पुन्हा एकदा समोर आले आहेत. नंदूरबारमध्ये स्वीकृत नगरसेवकाच्या निवडीवरून सत्ताधारी शिवसेना शिंदे गट आणि भाजपमध्ये वाद निर्माण झाला आहे. शिवसेनेचे आमदार चंद्रकांत रघुवंशी यांनी भाजपवर थेट निशाणा साधत खोचक टीका केली आहे. त्यांच्या या वक्तव्यामुळे महायुतीतील अंतर्गत संघर्षाची चर्चा पुन्हा रंगली आहे.
एका स्वीकृत नगरसेवकाने राजीनामा दिल्यानंतर नवीन नगरसेवकाच्या नियुक्तीची प्रक्रिया सुरू झाली होती. यावेळी भाजपकडून देण्यात आलेल्या उमेदवाराचा अर्ज कागदपत्रांमधील त्रुटींमुळे प्रांताधिकाऱ्यांनी अपात्र ठरवला. याच मुद्द्यावरून आमदार चंद्रकांत रघुवंशी यांनी भाजपवर जोरदार टीका केली.
‘१ लाख १० हजार मतदारांत एकही पात्र उमेदवार सापडला नाही’
नंदूरबार शहरात तब्बल १ लाख १० हजार मतदार असताना भाजपला स्वीकृत नगरसेवकपदासाठी एकही पात्र उमेदवार मिळाला नाही, अशी खोचक टीका रघुवंशी यांनी केली. ‘पात्र माणूस सापडू नये, याची मला लाज वाटते,’ अशा शब्दांत त्यांनी भाजपवर निशाणा साधला.याशिवाय योग्य उमेदवार शोधण्यासाठी इतरांचे मार्गदर्शन घेण्याचा टोलाही त्यांनी लगावला. त्यामुळे रघुवंशी यांच्या वक्तव्याची राजकीय वर्तुळात चर्चा सुरू झाली आहे.
नंदूरबारमध्ये महायुतीतील अंतर्गत मतभेद या निमित्ताने पुन्हा चव्हाट्यावर आले आहेत. आगामी जिल्हा परिषद निवडणुकीसाठी भाजप, शिवसेना शिंदे गट आणि राष्ट्रवादी काँग्रेसचे घटक स्वतंत्रपणे निवडणूक लढवण्याच्या तयारीत असल्याचे चित्र आहे.त्यामुळे जिल्हा परिषद निवडणुकीत महायुतीतील घटक पक्षच एकमेकांविरोधात मैदानात उतरण्याची शक्यता आहे. निवडणुकीपूर्वीच या पक्षांमध्ये आरोप-प्रत्यारोप सुरू झाल्याने नंदूरबारच्या राजकारणात वातावरण तापले आहे.
दरम्यान, भाजपकडून सत्ताकाळातील विकासकामांच्या जोरावर निवडणुकीला सामोरे जाण्याचा विश्वास व्यक्त केला जात आहे. त्यामुळे आगामी जिल्हा परिषद निवडणुकीत महायुतीतील घटक पक्षांमधील संबंध आणि त्याचा निवडणुकीवर होणारा परिणाम याकडे राजकीय वर्तुळाचे लक्ष लागले आहे.
Discussion about this post