‘अर्णब’ चक्रीवादळाचा कहर! ९० हून अधिक रेल्वे गाड्या रद्द; महाराष्ट्रातील या जिल्ह्यांना पावसाचा इशारा?

बंगालच्या उपसागरात तयार झालेले ‘अर्णब’ चक्रीवादळ आंध्र प्रदेशच्या किनारपट्टीच्या दिशेने सरकत असून, त्याची तीव्रता वाढल्याने प्रशासन सतर्क झाले आहे. २८ ऑक्टोबर रोजी दुपारपर्यंत हे वादळ आंध्र प्रदेशातील यानमजवळ किनारपट्टीवर धडकण्याची शक्यता वर्तवण्यात आली आहे. या वेळी वाऱ्यांचा वेग ताशी १२५ ते १३५ किलोमीटरपर्यंत, तर वाऱ्याचे झोत ताशी १५० किलोमीटरपर्यंत पोहोचण्याचा अंदाज आहे. वादळाच्या पार्श्वभूमीवर अनेक विमानसेवा रद्द करण्यात आल्या असून, रेल्वेनेही ९० हून अधिक गाड्या रद्द केल्याची माहिती समोर आली आहे.

आंध्र प्रदेशच्या किनारपट्टीवर वादळाचा धोका

भारतीय हवामान विभागाच्या अंदाजानुसार, ‘अर्णब’ चक्रीवादळ पश्चिम-वायव्य दिशेने पुढे सरकत आहे. हे वादळ आंध्र प्रदेशातील यानमजवळ, यानमच्या दक्षिणेकडे किनारपट्टीवर धडकण्याची शक्यता आहे. किनारपट्टीवर धडकताना वादळाची तीव्रता कायम राहिल्यास जोरदार वारे आणि मुसळधार पावसाचा सामना करावा लागू शकतो.

विशाखापट्टणम हवामान विभागाचे संचालक पी.एल.एन. मूर्ती यांच्या माहितीनुसार, चक्रीवादळ ताशी १८ किलोमीटर वेगाने पुढे सरकत होते. ते काकीनाडापासून सुमारे ७० किलोमीटर, विशाखापट्टणमच्या आग्नेयेला १७० किलोमीटर आणि बापटलापासून २४० किलोमीटर अंतरावर असल्याचे सांगण्यात आले. किनारपट्टीवरील परिस्थितीवर हवामान विभाग आणि प्रशासनाकडून लक्ष ठेवले जात आहे.

नऊ राज्यांना सतर्कतेचा इशारा; शाळा-महाविद्यालयांना सुट्टी

चक्रीवादळाचा संभाव्य परिणाम लक्षात घेऊन भारतीय हवामान विभागाने आंध्र प्रदेश, ओडिशा, तेलंगणा, छत्तीसगड, बिहार आणि पूर्व उत्तर प्रदेशासह नऊ राज्यांसाठी सतर्कतेचा इशारा दिला आहे. दिल्ली-एनसीआरसह काही भागांत मेघगर्जनेसह पावसाची शक्यताही व्यक्त करण्यात आली आहे. वादळामुळे वाहतूक व्यवस्थेवर परिणाम झाला आहे. अनेक विमानसेवा रद्द करण्यात आल्या असून, रेल्वेने ९० हून अधिक गाड्या रद्द केल्याचे वृत्त आहे. आंध्र प्रदेश, झारखंड आणि ओडिशातील काही भागांत शाळा व महाविद्यालयांना सुट्ट्या जाहीर करण्यात आल्या आहेत.

नागरिकांना सुरक्षित स्थळी हलवले

चक्रीवादळाचा धोका लक्षात घेऊन किनारपट्टीवरील संवेदनशील भागांतून नागरिकांना सुरक्षित स्थळी हलवण्यास सुरुवात झाली आहे. ओडिशातील गंजम जिल्ह्यातील नागरिकांना चक्रीवादळ निवारण केंद्रांमध्ये हलवण्यात आले आहे. गोपालपूर परिसरात सोसाट्याच्या वाऱ्यांसह मुसळधार पावसाला सुरुवात झाल्याचे वृत्त आहे.

चक्रीवादळाचा महाराष्ट्र्रावरही परिणाम

‘अर्णब’ चक्रीवादळाच्या प्रभावामुळे आज पूर्व विदर्भात पावसाचा जोर वाढण्याची शक्यता हवामान विभागाने वर्तवली आहे. गडचिरोली जिल्ह्यात मुसळधार पावसाचा अंदाज असून, तेथे ऑरेंज अलर्ट जारी करण्यात आला आहे. तसेच विदर्भातील काही जिल्ह्यांसह मराठवाडा आणि मध्य महाराष्ट्रातील काही भागांत विजांच्या कडकडाटासह पाऊस पडण्याची शक्यता आहे. या पार्श्वभूमीवर जिल्ह्यांना येलो अलर्ट देण्यात आला आहे.