जळगाव : यावल तालुक्यातील किनगाव येथे दसऱ्यानिमित्त राष्ट्रीय स्वयंसेवक संघाच्या पथसंचलनादरम्यान तणाव निर्माण झाला. शहरातून जाणाऱ्या पथसंचलनाला एका गटाने विरोध दर्शविल्यानंतर काही काळ गोंधळाचे वातावरण निर्माण झाले. यावेळी महिलांनी एका धार्मिक स्थळासमोर ठिय्या मांडल्याची माहिती आहे. परिस्थिती तणावपूर्ण बनत असतानाच तुरळक दगडफेक झाल्याने पोलिसांनी सौम्य लाठीचार्ज करून जमावाला पांगवले.
विरोधानंतर वातावरण तणावपूर्ण
दसऱ्यानिमित्त किनगाव शहरातून राष्ट्रीय स्वयंसेवक संघाचे पथसंचलन काढण्याची तयारी सुरू होती. हे पथसंचलन एका धार्मिक स्थळासमोरून जात असताना एका गटाने विरोध दर्शविला. यावेळी काही महिलांनी घटनास्थळी ठिय्या मांडल्याने तणाव वाढला. परिस्थिती नियंत्रणात ठेवण्यासाठी पोलिसांनी हस्तक्षेप केला.
जिल्ह्यातील वरिष्ठ अधिकारी घटनास्थळी
तणावाच्या पार्श्वभूमीवर जळगाव जिल्ह्यातील विविध पोलीस ठाण्यांचा अतिरिक्त फौजफाटा किनगावमध्ये दाखल झाला. तुरळक दगडफेक सुरू झाल्यानंतर पोलिसांनी सौम्य लाठीचार्ज केला. जमाव पांगल्यानंतर पोलीस बंदोबस्तात पथसंचलन सुरळीत पार पडले.
वरिष्ठ अधिकाऱ्यांसह मोठा पोलीस बंदोबस्त
घटनेची गंभीरता लक्षात घेऊन पोलीस अधीक्षक श्रीकांत धिवरे, अपर पोलीस अधीक्षक संदीप गावित आणि विभागीय पोलीस अधिकारी अनिल बडगुजर यांच्यासह भुसावळ, यावल आणि रावेर येथील पोलीस पथके किनगावमध्ये दाखल झाली.
सध्या किनगाव परिसरात तणावपूर्ण शांतता असून, परिस्थिती नियंत्रणात ठेवण्यासाठी पोलिसांकडून बंदोबस्त तैनात करण्यात आला आहे. नागरिकांनी अफवांवर विश्वास ठेवू नये आणि शांतता राखण्यासाठी पोलिसांना सहकार्य करावे, असे आवाहन करण्यात आले आहे.
Discussion about this post