जळगाव । जळगाव शहरातील खेडी बुद्रुक येथील माऊली नगर परिसरात दुचाकीच्या लाईटवरून झालेल्या क्षुल्लक वादातून एका तरुणावर धारदार चॉपरने प्राणघातक हल्ला करण्यात आला. या दुर्दैवी घटनेत ४४ वर्षीय किरण विठ्ठल पाटील यांचा मृत्यू झाला असून, त्यांचे साथीदार किशोर छगन पाटील हे गंभीर जखमी झाले आहेत. एमआयडीसी पोलिसांनी अवघ्या काही तासांतच कारवाई करत संशयित आरोपीला बेड्या ठोकल्या आहेत.
नेमकी घटना काय?
माऊली नगर परिसरात काही महिला बसलेल्या असताना संशयित मयूर चैत्राराम जाधव हा दुचाकीवरून तेथे आला. त्याने वारंवार दुचाकीचा लाईट सुरू-बंद केल्यामुळे परिसरातील महिलांनी त्याला जाब विचारला. यावरून वाद वाढला. या वादात मध्यस्थी करताना किंवा वादाच्या दरम्यान संशयिताने धारदार चॉपरने केलेल्या हल्ल्यात किरण पाटील आणि किशोर पाटील गंभीर जखमी झाले. उपचारादरम्यान किरण पाटील यांचा मृत्यू झाला, तर किशोर पाटील यांच्यावर सध्या रुग्णालयात उपचार सुरू आहेत.
घटनेची माहिती मिळताच एमआयडीसी पोलीस ठाण्याचे निरीक्षक बबन आव्हाड यांनी तातडीने गुन्हे शोध पथकाला तपासासाठी रवाना केले. पोलिसांनी घटनास्थळाची पाहणी करून तांत्रिक तपास आणि परिसरातील सीसीटीव्ही फुटेजच्या आधारे संशयित मयूर चैत्राराम जाधव याचा शोध घेतला आणि अवघ्या काही तासांत त्याला ताब्यात घेतले.
जखमी किशोर छगन पाटील यांनी दिलेल्या फिर्यादीवरून एमआयडीसी पोलीस ठाण्यात गुन्हा दाखल करण्यात आला आहे. भारतीय न्याय संहिता (BNS) २०२३ मधील कलम १०३(१), १०९(१), ३५१(२) आणि ३५२ नुसार हा गुन्हा नोंदवण्यात आला असून, पुढील तपास पोलीस उपनिरीक्षक कृष्णा पाटील करीत आहेत.
Discussion about this post