मुंबई : मराठा आरक्षण आंदोलनाचे नेते मनोज जरांगे पाटील यांनी शिवसेनेचे मुख्य नेते एकनाथ शिंदे यांच्यावर केलेल्या ५०० कोटी रुपयांच्या कथित व्यवहाराच्या आरोपामुळे राज्यातील राजकीय वातावरण तापले आहे. नारायण गडावरील दसरा मेळाव्यात जरांगे पाटील यांनी एकनाथ शिंदे यांनी त्यांच्या नावाने भाजपकडून ५०० कोटी रुपये घेतल्याचा खळबळजनक आरोप केला होता. आता या आरोपासंदर्भातील पुरावे उद्या सकाळी ११ वाजता पत्रकार परिषद घेऊन देणार असल्याचे त्यांनी म्हटले आहे.
दसरा मेळाव्यात बोलताना मनोज जरांगे पाटील यांनी मराठा समाजाने आणखी भक्कम आणि मोठे होण्याचे आवाहन केले. याच भाषणादरम्यान त्यांनी एकनाथ शिंदे यांच्यावर गंभीर आरोप करत या प्रकरणावर त्यांनी खुलासा करावा, अशी मागणी केली होती. त्यानंतर आज टीव्ही ९ मराठीशी बोलताना त्यांनी उद्या सकाळी ११ वाजता पुरावे सादर करणार असल्याचे सांगितले.
‘माझा समाज लेचापेचा नाही’
आपल्या भूमिकेबाबत बोलताना मनोज जरांगे पाटील म्हणाले की, मराठा समाजाच्या अस्तित्वाचा प्रश्न महत्त्वाचा आहे. समाजासाठी आपण लढत असून, कोणत्याही परिस्थितीत आपण मागे हटणार नाही, असेही त्यांनी स्पष्ट केले. समाजाच्या हिताच्या मुद्द्यावर कोणी पुढे येऊन बोलले, तर त्याला उत्तर दिले जाईल, असा इशाराही त्यांनी दिला.
यावेळी त्यांनी काही राजकीय नेत्यांचा उल्लेख करत त्यांच्याबद्दल आपण थेट काही बोलणार नसल्याचे सांगितले. मात्र, आरोपांबाबत पुरावे मागितले जात असतील, तर ते पत्रकार परिषदेत देणार असल्याचे त्यांनी पुन्हा स्पष्ट केले.
रामदास कदम यांचे जरांगेंना आवाहन
दरम्यान, शिवसेना नेते रामदास कदम यांनी मनोज जरांगे पाटील यांना प्रतिक्रिया देताना मराठा समाजातील व्यक्तींनी अफवा किंवा कुजबुजीकडे लक्ष देऊ नये, असे आवाहन केले. ज्याच्यात हिंमत असेल, त्याने समोर येऊन बोलावे आणि त्यानंतर त्याला उत्तर द्यावे, अशी भूमिका त्यांनी मांडली. मनोज जरांगे पाटील यांनी एकनाथ शिंदे यांच्यावर केलेल्या आरोपांमुळे राजकीय वर्तुळात चर्चांना उधाण आले आहे. उद्या सकाळी ११ वाजता होणाऱ्या पत्रकार परिषदेत ते नेमके कोणते पुरावे सादर करतात आणि या आरोपांवर एकनाथ शिंदे यांच्याकडून काय प्रतिक्रिया येते, याकडे सर्वांचे लक्ष लागले आहे.
Discussion about this post