टायगर श्रॉफवरील गोळीबारानंतर अभिजीत दीपकेंची पोलिसांवर नाराजी; काय म्हणाले?

मुंबई । बॉलिवूड अभिनेता टायगर श्रॉफ याच्या कारवर झालेल्या गोळीबाराच्या घटनेनंतर कॉकरोच जनता पार्टीचे (CJP) संस्थापक अभिजीत दीपके यांनी पोलिसांच्या कार्यपद्धतीवर नाराजी व्यक्त केली आहे. विद्यार्थी आणि कार्यकर्त्यांवर कारवाई करण्याऐवजी पोलिसांनी खऱ्या आरोपींकडे लक्ष केंद्रित करावे, अशी मागणी त्यांनी केली आहे. या गोळीबाराची जबाबदारी लॉरेन्स बिश्नोई टोळीशी संबंधित व्यक्तींनी स्वीकारल्याचा दावा करण्यात आला असून, मुंबई पोलिसांकडून या प्रकरणाचा तपास सुरू आहे.

अभिजीत दीपके म्हणाले, “विद्यार्थी आणि कार्यकर्त्यांवर कारवाई करण्याऐवजी पोलिसांनी खऱ्या आरोपींवर लक्ष दिलं पाहिजे. जेव्हा सरकार आणि पोलीस चुकीच्या गोष्टींना प्राथमिकता देतात, तेव्हा असंच घडतं.” टायगर श्रॉफवरील हल्ल्याच्या पार्श्वभूमीवर त्यांनी ही प्रतिक्रिया दिली आहे.दरम्यान, मागील आठवड्यात दिल्ली पोलिसांनी अभिजीत दीपके यांना अटक केली होती. त्यांच्यासोबत आशुतोष रांका आणि सौरभ दास यांनाही अटक करण्यात आल्याची माहिती आहे. सध्या अभिजीत दीपके जामिनावर बाहेर असल्याचे सांगण्यात आले आहे.

जुहूमध्ये टायगर श्रॉफच्या कारवर गोळीबार

मुंबईतील जुहू परिसरात रविवारी संध्याकाळी दोन अज्ञात हल्लेखोरांनी अभिनेता टायगर श्रॉफ याच्या कारवर गोळीबार केल्याची घटना घडली. हल्लेखोरांनी चार ते पाच राऊंड फायरिंग केल्याची माहिती आहे. या हल्ल्यात टायगर श्रॉफ थोडक्यात बचावला; मात्र त्याच्या ड्रायव्हरसह दोन जण जखमी झाल्याचे वृत्त आहे.

या घटनेनंतर लॉरेन्स बिश्नोई टोळीशी संबंधित असल्याचा दावा करणाऱ्या अनिल पंडित आणि हरमन संधू यांनी हल्ल्याची जबाबदारी स्वीकारल्याचे सांगण्यात येत आहे. तसेच, सलमान खानसोबत काम करणाऱ्या आणि आपल्या धमक्यांकडे दुर्लक्ष करणाऱ्या फिल्म इंडस्ट्रीतील व्यक्तींना लक्ष्य करण्याची धमकी दिल्याचा दावा करण्यात आला आहे.

तपासासाठी मुंबई पोलिसांची १५ पथके

गोळीबाराच्या घटनेनंतर मुंबई पोलिसांनी तपासाला वेग दिला आहे. हल्लेखोरांचा शोध घेण्यासाठी १५ पथके तयार करण्यात आल्याची माहिती आहे. परिसरातील सीसीटीव्ही फुटेज तपासले जात असून, हल्लेखोरांनी वापरलेल्या दुचाकीचा शोध घेतला जात आहे. संशयितांच्या हालचालींचा मागोवा घेण्यासाठी विविध ठिकाणी नाकेबंदी करण्यात आली असून, फॉरेन्सिक पथकाकडून घटनास्थळावरील पुरावे गोळा करण्यात येत आहेत.महाराष्ट्राचे मुख्यमंत्री देवेंद्र फडणवीस यांनीही रात्री उशिरा टायगर श्रॉफशी संवाद साधून त्याला शक्य ती सर्व मदत करण्याचे आश्वासन दिल्याचे सांगण्यात आले आहे.