मुंबई : मुख्यमंत्री माझी लाडकी बहीण योजनेच्या लाभार्थी महिलांसाठी महत्त्वाची बातमी समोर आली आहे. ऑक्टोबर महिन्याचा अर्धा कालावधी उलटून गेला असतानाही सप्टेंबर महिन्याचा १,५०० रुपयांचा सन्मान निधी अद्याप खात्यात जमा झालेला नसल्याने महिलांमध्ये प्रतीक्षा वाढली आहे. आता हा हप्ता पुढील आठवड्यात मिळणार का, तसेच दिवाळीपूर्वी सप्टेंबर आणि ऑक्टोबर या दोन्ही महिन्यांचे मिळून ३,००० रुपये खात्यात जमा होणार का, याबाबत चर्चा सुरू आहे.
पुढील आठवड्यात खात्यात जमा होणार ₹१,५००?
लाडकी बहीण योजनेच्या सप्टेंबर महिन्याच्या हप्त्याबाबत अद्याप अधिकृत तारीख जाहीर झालेली नाही. मात्र, २५ ऑक्टोबरनंतर लाभार्थी महिलांच्या खात्यात पैसे जमा होण्याची शक्यता व्यक्त केली जात आहे. दसऱ्यानंतर होणाऱ्या मंत्रिमंडळाच्या बैठकीत यासंदर्भात निर्णय होऊ शकतो, असा अंदाज वर्तवला जात आहे. तथापि, सरकारकडून अधिकृत घोषणा झालेली नसल्याने हप्ता नेमका कधी मिळणार, हे अद्याप स्पष्ट झालेले नाही.
मागील हप्त्यांच्या वितरणाकडे महिलांचे लक्ष
मागील काही महिन्यांत योजनेचा सन्मान निधी महिन्याच्या अखेरीस वितरित करण्यात आला होता. जुलै महिन्याचा हप्ता २८ ऑगस्ट रोजी जमा झाला होता, तर ऑगस्ट महिन्याच्या हप्त्याच्या वितरणाची प्रक्रिया २७ सप्टेंबरनंतर सुरू झाली होती. या पार्श्वभूमीवर सप्टेंबर महिन्याचा हप्ता ऑक्टोबरच्या शेवटच्या आठवड्यात जमा होऊ शकतो, असा अंदाज व्यक्त केला जात आहे.
दिवाळीपूर्वी मिळणार ₹३,०००?
सप्टेंबर महिन्याचा हप्ता रखडल्याने आता लाभार्थी महिलांना दिवाळीपूर्वी दोन महिन्यांचे मिळून ३,००० रुपये मिळणार का, असा प्रश्न उपस्थित होत आहे. सप्टेंबर आणि ऑक्टोबर या दोन्ही महिन्यांचा सन्मान निधी एकत्र वितरित केला जाण्याची चर्चा असली, तरी याबाबत राज्य सरकारने कोणतीही अधिकृत घोषणा केलेली नाही. त्यामुळे महिलांनी दोन महिन्यांचे पैसे एकत्र मिळतील, असे गृहीत धरू नये.
ई-केवायसी आणि पात्रतेची पडताळणी महत्त्वाची
मुख्यमंत्री माझी लाडकी बहीण योजनेअंतर्गत पात्र महिलांना दरमहा १,५०० रुपयांचा सन्मान निधी थेट लाभ हस्तांतरण (DBT) पद्धतीने बँक खात्यात दिला जातो. मात्र, ई-केवायसी, लाभार्थी पात्रतेची पडताळणी आणि बँक खात्याशी संबंधित अडचणींमुळे काही महिलांच्या लाभावर परिणाम होऊ शकतो.
Discussion about this post