नवी दिल्ली। कॉकरोच जनता पार्टीचे नेते अभिजीत दीपके यांनी दिल्ली पोलिसांवर गंभीर आरोप करत खळबळजनक खुलासा केला आहे. १० ऑक्टोबर रोजी नवी दिल्लीत आंदोलन पुकारल्यानंतर पोलिसांनी आपल्याला विमानातून अटक केली आणि आपल्यासह सहकाऱ्यांना तब्बल २४ तास अशा ठिकाणी ठेवले, जिथे आपण नेमके कुठे आहोत, याची माहितीही देण्यात आली नव्हती, असा आरोप दीपके यांनी केला आहे. या काळात मोबाईल फोन काढून घेण्यात आले होते आणि कुटुंबीयांसह वकिलांशीही संपर्क होऊ दिला नाही, असे त्यांनी सांगितले.
१० ऑक्टोबर रोजी अभिजीत दीपके यांनी नवी दिल्लीत आंदोलन पुकारले होते. त्यावेळी दिल्ली पोलिसांनी विमानात प्रवेश करून त्यांना अटक केली होती. त्यांच्यासोबत त्यांच्या सहकाऱ्यांनाही ताब्यात घेण्यात आले होते. या कारवाईनंतर दीपके यांचा कोणाशीही संपर्क होऊ नये, याची खबरदारी पोलिसांनी घेतल्याचा आरोप करण्यात आला. त्यामुळे ते नेमके कुठे आहेत, असा प्रश्न उपस्थित केला जात होता. या पार्श्वभूमीवर माध्यमांशी संवाद साधताना दीपके यांनी आपली बाजू मांडली. “मला अनधिकृतपणे अटक करण्यात आली. मला आणि माझ्या सहकाऱ्यांना अशा ठिकाणी २४ तास ठेवण्यात आले, जिथे आम्ही कुठे आहोत, याची आम्हालाच माहिती नव्हती. आमचे फोन काढून घेण्यात आले होते. आमचा कोणाशीही संपर्क होत नव्हता. माझ्या वकिलांनाही आम्ही कुठे आहोत, हे माहीत नव्हते,” असा आरोप त्यांनी केला.
दरम्यान, कॉकरोच जनता पार्टीचे नेते आशुतोष रांका, सौरव दास आणि अजिंक्य शिंदे यांनी जंतरमंतर येथे तिरंगा फडकावला. त्यानंतर पोलिसांनी त्यांना ताब्यात घेतल्याचे दीपके यांनी सांगितले. सरकारविरोधात आवाज उठवणाऱ्यांवर कारवाई केली जात असल्याचा आरोप करत त्यांनी पोलिसांच्या भूमिकेवर प्रश्नचिन्ह उपस्थित केले. जंतरमंतरवर तिरंगा फडकावला म्हणून आशुतोष आणि इतरांना अटक करण्यात आली. देशात गुंडागर्दी सुरू आहे. मलाही विमानातून अटक केली. विमानातून अटक करायला मी काय दहशतवादी आहे का? मी गुंड आहे का?” असा सवाल दीपके यांनी केला. अमेरिकेच्या सांगण्यावरून काही लोकांना सोडले जाते, तर आम्हाला अटक केली जाते, असाही आरोप त्यांनी केला.
‘जंतरमंतर तुमच्या घरची प्रॉपर्टी आहे का?’
सरकारविरोधात बोलणाऱ्यांना अटक केली जात असल्याचा आरोप करत दीपके यांनी जंतरमंतरवर आंदोलन करण्याच्या अधिकाराचा मुद्दा उपस्थित केला. “जंतरमंतर तुमच्या घरची प्रॉपर्टी आहे का? आम्हाला जंतरमंतरवर आंदोलन करण्याचा अधिकार आहे,” असे ते म्हणाले. याशिवाय, आपल्या आजीचे निधन झालेले असतानाही दिल्ली पोलिसांकडून कुटुंबीयांना फोन करण्यासाठी दबाव टाकला जात होता, असा आरोप त्यांनी केला. मध्यरात्री फोन करून घरच्यांना मानसिक त्रास देण्याचा प्रयत्न झाला. आपण बऱ्याच दिवसांसाठी तुरुंगात जाणार असल्याचे घरच्यांना सांगितले जात होते, असा दावाही दीपके यांनी केला.
दिल्ली पोलिसांच्या कारवाईबाबत अभिजीत दीपके यांनी केलेल्या या आरोपांमुळे राजकीय वर्तुळात चर्चा सुरू झाली आहे. मात्र, या आरोपांबाबत दिल्ली पोलिसांची अधिकृत बाजू समोर आल्यास प्रकरणाचे चित्र अधिक स्पष्ट होईल
Discussion about this post