नवी दिल्ली । मुख्य निवडणूक आयुक्त ज्ञानेश कुमार यांच्या राजीनाम्याच्या मागणीवरून इंडिया आघाडीने केंद्र सरकारविरोधात आक्रमक भूमिका घेतली आहे. या प्रकरणी सर्वोच्च न्यायालयात याचिका दाखल करण्याचा निर्णय विरोधकांनी घेतला असून, लोकसभेतील विरोधी पक्षनेते राहुल गांधी यांनी पत्रकार परिषदेत याबाबत माहिती दिली. ‘ज्ञानेश कुमार यांच्यासारख्या चोराला का वाचवताय?’ असा थेट सवाल त्यांनी पंतप्रधान नरेंद्र मोदी यांना केला. तसेच, ज्ञानेश कुमार यांना वाचवण्याचा प्रयत्न करणारे सरकार मोठी चूक करत असल्याचा आरोपही त्यांनी केला.
‘आम्ही थांबणार नाही’; राहुल गांधींचा इशारा
सरन्यायाधीशांनी भेट नाकारल्यानंतर सर्वोच्च न्यायालयात याचिका दाखल करण्याचा निर्णय घेण्यात आल्याचे राहुल गांधी यांनी सांगितले. विरोधी पक्ष सर्वोच्च न्यायालयापर्यंत मार्च काढून याचिका दाखल करणार असल्याचेही त्यांनी स्पष्ट केले. “तुम्ही आम्हाला किती दिवस अडवणार? आम्ही थांबणार नाही. जितके दिवस लागतील तितके दिवस आम्ही लढू,” अशा शब्दांत राहुल गांधी यांनी आपली भूमिका मांडली. ज्ञानेश कुमार यांना आम्ही सोडणार नाही, ते वाचणार नाहीत, असा इशाराही त्यांनी दिला.
मोर्चापूर्वी आयोजित पत्रकार परिषदेत राहुल गांधी यांनी भाजप आणि राष्ट्रीय स्वयंसेवक संघावर गंभीर आरोप केले. गेल्या चार-पाच दिवसांपासून मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी आंदोलन सुरू असल्याचे त्यांनी सांगितले. या आंदोलनादरम्यान आंदोलक महिला आणि तरुणांना भाजप व आरएसएसशी संबंधित लोकांकडून मारहाण केली जात असल्याचा आरोप राहुल गांधी यांनी केला. या घटनांचे अनेक व्हिडिओ पुरावे असल्याचा दावाही त्यांनी केला. लोकशाही वाचवण्यासाठी हे आंदोलन सुरू असल्याचे सांगत, या प्रकरणातील सर्व माहिती आपल्याकडे असल्याचे ते म्हणाले.
दिल्लीला तुरुंगाचे स्वरूप दिल्याचा आरोप
दिल्लीतील आंदोलनाच्या पार्श्वभूमीवर राहुल गांधी यांनी पोलिस बंदोबस्त आणि वाहतूक व्यवस्थेवरही प्रश्न उपस्थित केले. मतांच्या चोरीविरोधात निदर्शने सुरू असताना संपूर्ण दिल्लीला तुरुंग आणि किल्ल्याचे स्वरूप देण्यात आल्याचा आरोप त्यांनी केला. लोकांना शहरात येण्यापासून रोखण्यासाठी मेट्रो, रेल्वे आणि बससेवा बंद केल्या जात असल्याचा दावा त्यांनी केला. तसेच, रस्त्यांवर २० ते ३० हजार पोलीस तैनात असल्याचे सांगत पोलिसांवरही दबाव असल्याचा आरोप केला. तरुणांवर लाठीमार करण्याचे आदेश पोलिसांना दिले जात असल्याचा आरोप करताना, दुसरीकडे आरएसएसच्या लोकांना मोकळीक दिली जात असल्याचेही राहुल गांधी म्हणाले.
निवडणूक प्रक्रियेवरून संघर्ष तीव्र
मुख्य निवडणूक आयुक्त ज्ञानेश कुमार यांच्या राजीनाम्याची मागणी आणि मतांच्या चोरीचे आरोप यांमुळे केंद्र सरकार व विरोधी पक्षांमधील संघर्ष आणखी तीव्र होण्याची शक्यता आहे. सर्वोच्च न्यायालयात याचिका दाखल करण्याच्या निर्णयामुळे या प्रकरणाला आता कायदेशीर वळण मिळणार आहे.दरम्यान, राहुल गांधी यांनी पत्रकार परिषदेत केलेले आरोप हे त्यांचे दावे असून, त्यां ची स्वतंत्र पुष्टी या वृत्तातून करण्यात आलेली नाही.
Discussion about this post