जिओ टॉवरच्या डिझेल चोरीचा छडा; दोन वर्षांपूर्वीचा कर्मचारी जळगाव पोलिसांच्या जाळ्यात

जळगाव । जिओ टॉवरच्या जनरेटरमधील डिझेल चोरीच्या चार घटनांचा स्थानिक गुन्हे शाखेने छडा लावला आहे. या प्रकरणाच्या तपासात पोलिसांनी समीर जानमोहम्मद तडवी (वय ३०, रा. अकलूद, ता. यावल) याला ताब्यात घेतले. पोलिसांच्या चौकशीत त्याने जळगाव तालुक्यातील चार वेगवेगळ्या टॉवरमधून ९२० लिटर डिझेल चोरी केल्याची कबुली दिल्याचे समोर आले आहे. त्याच्याकडून ६५ लिटर डिझेलसह ५० हजार रुपयांची रोकड हस्तगत करण्यात आली आहे.

नशिराबाद पोलीस ठाण्याच्या हद्दीत जिओ टॉवरच्या जनरेटरमधून डिझेल चोरीच्या घटना सातत्याने समोर येत होत्या. त्यामुळे या चोऱ्यांचा तपास करण्याचे आदेश पोलीस अधीक्षक श्रीकांत धिवरे यांनी स्थानिक गुन्हे शाखेला दिले. त्यानंतर वरिष्ठ पोलीस निरीक्षक राहुल गायकवाड यांच्या नेतृत्वाखाली स्वतंत्र पथक तयार करण्यात आले.

दोन वर्षांपूर्वीच्या कर्मचाऱ्याचा धागा

चोरीचा तपास करताना पोलिसांनी केवळ घटनास्थळावरील माहितीवर अवलंबून न राहता संबंधित जिओ टॉवरवर पूर्वी काम करणाऱ्या व्यक्तींची माहिती गोळा करण्यास सुरुवात केली. याच तपासात समीर तडवी हा सुमारे दोन वर्षांपूर्वी जिओ टॉवरवर डिझेल भरण्याचे काम करत होता, अशी माहिती पथकाच्या हाती लागली.

ही माहिती मिळताच पोलिसांनी अकलूद येथे त्याचा शोध घेतला आणि त्याला ताब्यात घेतले. चौकशीच्या सुरुवातीला त्याने डिझेल चोरीबाबत स्पष्ट माहिती दिली नाही. मात्र, पोलिसांनी कसून चौकशी केल्यानंतर त्याने चोरीची कबुली दिल्याचे पोलिसांनी सांगितले.

चार टॉवर, तब्बल ९२० लिटर डिझेल

तपासात समीरने जळगाव तालुक्यातील चार ठिकाणच्या जिओ टॉवरमधून डिझेल चोरी केल्याची माहिती समोर आली. त्यानुसार खिर्डी शिवारातील टॉवरमधून २३० लिटर, कडगाव रस्त्याजवळील टॉवरमधून २३० लिटर, भादली रेल्वे गेटजवळील टॉवरमधून २२० लिटर, तर असोदा रोडवरील टॉवरमधून २४० लिटर डिझेल चोरी झाल्याचे निष्पन्न झाले. चारही ठिकाणांहून चोरी झालेल्या डिझेलचे प्रमाण एकत्रितपणे ९२० लिटर इतके आहे.

नशिराबाद पोलिसांत चार गुन्हे

या प्रकरणी नशिराबाद पोलीस ठाण्यात भारतीय न्याय संहिता २०२३ मधील कलम ३०३(२) अंतर्गत चार स्वतंत्र गुन्हे दाखल आहेत. गुन्हे क्रमांक २५५/२०२६, २५६/२०२६, २५७/२०२६ आणि २५८/२०२६ अशा चारही प्रकरणांचा तपास करताना संशयिताचा सहभाग समोर आल्याचे पोलिसांनी सांगितले.कारवाईदरम्यान त्याच्याकडून ६५ लिटर डिझेल आणि ५० हजार रुपये रोख असा मुद्देमाल जप्त करण्यात आला आहे. चारही गुन्ह्यांची उकल झाल्यानंतर या प्रकरणाचा पुढील तपास नशिराबाद पोलीस ठाण्याकडून सुरू आहे.