जळगाव । जळगाव येथे पार पडलेल्या पोलीस पाटील मेळाव्यात पोलीस पाटलांच्या मानधनवाढीच्या फाईलवरून मोठी राजकीय जुगलबंदी रंगली. आमदार मंगेश चव्हाण यांनी आपल्या खास शैलीत थेट मंत्र्यांनाच जबाबदार धरत टिप्पणी केली, तर मंत्री गुलाबराव पाटील आणि वस्त्रोद्योग मंत्री संजय सावकारे यांनीही यावर मिश्किल टोलेबाजी करत संपूर्ण मेळाव्यात हशा पिकवला. पोलीस पाटलांच्या मानधनवाढीचा मुद्दा महत्त्वाचा असला, तरी या ‘फाईल’ प्रकरणावरून रंगलेली नेत्यांची ही जुगलबंदी सध्या जळगावात जोरदार चर्चेचा विषय ठरली आहे.
आमदार मंगेश चव्हाण यांचा मिश्किल इशारा:
मेळाव्यात बोलताना आमदार मंगेश चव्हाण यांनी, “माझं कामच फाईल घेऊन फिरण्याचं आहे, मी तुमची फाईल घेऊन फिरेल; मात्र काम झालं नाही तर मंत्री गिरीश महाजन आणि गुलाबराव पाटील हे दोघे जबाबदार असतील,” अशी मिश्किल टिप्पणी केली. त्यांच्या या वक्तव्यामुळे उपस्थितांमध्ये चांगलीच चर्चा रंगली.
गुलाबराव पाटलांचा तुटपुंजा टोला:
आमदार चव्हाणांच्या या वक्तव्यावर राज्याचे मंत्री गुलाबराव पाटील यांनी आपल्या नेहमीच्या खणखणीत आणि हसवणाऱ्या शैलीत टोला लगावला. “पोलीस पाटलांना सर्व राजकारणी घाबरतात. त्यामुळे आमदार मंगेश चव्हाण फाईल का फिरवतात, हे आता माझ्या लक्षात आलं. आम्ही तुमची फाईल फिरवली की तुम्ही आमची फाईल फिरवता,” असे म्हणत त्यांनी वातावरणात वेगळाच रंग भरला आणि उपस्थितांची दाद मिळवली.
संजय सावकारे यांनी केले कौतुक:
या जुगलबंदीत वस्त्रोद्योग मंत्री संजय सावकारे यांनीही उडी घेत आमदार मंगेश चव्हाण यांच्या कामाच्या पद्धतीचे कौतुक केले. “आमदार मंगेश चव्हाण फाईल मंजूर करण्यात एकदम एक्सपर्ट आहेत. आमची एखादी फाईल अडकली तर आम्ही त्यांनाच सांगतो आणि ते ती फाईल लवकरात लवकर मंजूर करून आणतात,” असे सांगत त्यांनी चव्हाणांच्या पाठपुराव्याची प्रशंसा केली.
मानधनवाढीच्या गंभीर विषयावर सुरू असलेल्या या मेळाव्यात नेत्यांच्या या दिलखुलास आणि मिश्किल संवादाने कार्यक्रमात वेगळीच रंगत आणली.
Discussion about this post