जळगाव । शिवसेना शिंदे गटाचे नेते तथा मंत्री गुलाबराव पाटील आपल्या रोखठोक आणि मिश्कील वक्तव्यांसाठी ओळखले जातात. यावेळी त्यांनी भाजपच्या पक्षफोडीच्या राजकारणाचा संदर्भ देत थेट शिक्षकांनाच एक अनोखा सल्ला दिला आहे. मराठी शाळांमधील विद्यार्थ्यांची घटती पटसंख्या वाढवायची असेल, तर इंग्रजी माध्यमांच्या शाळांमधील विद्यार्थी ‘फोडा’, असे वक्तव्य गुलाबराव पाटील यांनी केले.
जळगाव जिल्हा परिषदेच्या वतीने शिक्षकदिनानिमित्त आयोजित आदर्श शिक्षक पुरस्कार वितरण सोहळ्यात ते बोलत होते. मराठी माध्यमाच्या शाळांसमोर विद्यार्थ्यांची पटसंख्या टिकवण्याचे मोठे आव्हान उभे राहिले असल्याचा मुद्दा त्यांनी यावेळी उपस्थित केला.
भाजपच्या राजकारणाचा दिला दाखला
आपल्या भाषणात गुलाबराव पाटील यांनी भाजपच्या राजकारणावर मिश्कील टिप्पणी केली. “ज्या पद्धतीने भाजपवाले आमचे लोक फोडतात, पक्ष फोडतात, या पक्षातून त्या पक्षात आणि त्या पक्षातून या पक्षात नेतात, त्याच पद्धतीने मराठी शाळांमधील पटसंख्या वाढवण्यासाठी शिक्षकांनी इंग्रजी माध्यमांच्या शाळांमधील विद्यार्थी फोडले पाहिजेत,” असे ते म्हणाले.त्यांच्या या वक्तव्यानंतर सभागृहात एकच हशा पिकला. मात्र, मंत्री पाटील यांच्या या विधानाची राजकीय वर्तुळासह शिक्षण क्षेत्रातही चर्चा सुरू झाली आहे.
‘हम दो, हमारे दो… इंग्लिश में जाने दो’
मराठी शाळांतील विद्यार्थीसंख्या कमी होत असल्याच्या मुद्द्यावर बोलताना गुलाबराव पाटील यांनी कुटुंब नियोजनाचा संदर्भही दिला. “मराठी शाळांमधील पटसंख्या टिकवणे हे मोठे चॅलेंज बनले आहे. आता ‘हम दो, हमारे दो आणि इंग्लिश में जाने दो’ हा मोठा कार्यक्रम बनला आहे,” असे ते मिश्कीलपणे म्हणाले.
सरकारी आणि इंग्रजी माध्यमांच्या शाळांमध्ये स्पर्धा वाढली असून, आता खासगी इंग्रजी शाळांमध्येही विद्यार्थ्यांसाठी मोठी स्पर्धा पाहायला मिळत असल्याचे त्यांनी सांगितले. दरम्यान, भाजपच्या राजकारणाचा दाखला देत शिक्षकांना इंग्रजी शाळांतील विद्यार्थी ‘फोडण्याचा’ दिलेला गुलाबराव पाटील यांचा हा सल्ला आता चर्चेचा विषय ठरला असून, त्यांच्या वक्तव्यामुळे अनेकांच्या भुवया उंचावल्या आहेत.
Discussion about this post