जळगावात स्पाच्या नावाखाली नको तो धंदा’; उच्चभ्रू वस्तीत देहविक्रीचा पर्दाफाश

जळगाव : जळगाव शहरातील उच्चभ्रू वस्तीत मसाज सेंटरच्या नावाखाली सुरू असलेल्या कथित देहविक्रीच्या व्यवसायाचा जिल्हा पेठ पोलिसांनी पर्दाफाश केला आहे. या कारवाईत पोलिसांनी ६ महिलांची सुटका केली असून  या कारवाईमुळे शहरातील स्पा सेंटरच्या नावाखाली सुरू असलेल्या गैरप्रकारांचा मुद्दा पुन्हा ऐरणीवर आला आहे.

जिल्हा पेठ पोलीस ठाण्याच्या हद्दीत असलेल्या या स्पा सेंटरमध्ये मसाज सेवांच्या नावाखाली ग्राहकांना लैंगिक सेवा पुरवल्या जात असल्याची माहिती पोलिसांना मिळाली. माहितीची खातरजमा केल्यानंतर पोलिसांनी संबंधित स्पावर छापा टाकला. कारवाईदरम्यान तेथे आढळून आलेल्या सहा महिलांना पोलिसांनी ताब्यात घेत त्यांची सुरक्षित सुटका केली.

सुटका करण्यात आलेल्या महिलांमध्ये दार्जिलिंग, पश्चिम बंगाल येथील २६ वर्षीय महिला, मणिपूर येथील ३१ व ३७ वर्षीय दोन महिला, पूर्व सिक्कीम येथील ३० व ३१ वर्षीय दोन महिला, तसेच नेपाळच्या बांके जिल्ह्यातील २६ वर्षीय महिला यांचा समावेश आहे.

नेपाळमधील महिलेचा समावेश असल्याने पोलिसांनी या प्रकरणाकडे अधिक गांभीर्याने पाहिले आहे. संबंधित महिलेचा पासपोर्ट, व्हिसा तसेच भारतात येण्याची प्रक्रिया आणि सीमापार प्रवासाची पार्श्वभूमी याची तपासणी केली जात आहे. महिलांना या स्पा सेंटरमध्ये नेमके कशा पद्धतीने आणण्यात आले, त्यांची नियुक्ती कशी करण्यात आली आणि त्यांच्याकडून कोणत्या प्रकारच्या सेवा घेतल्या जात होत्या, याचाही तपास सुरू आहे.

स्पा मालकावर मुख्य आरोप

या प्रकरणात पोलिसांनी नीरज सिंह पंड्या (रा. मुखर्जी नगर, रतलाम, मध्य प्रदेश) याला आरोपी केले आहे. तो संबंधित स्पाचा मालक व परवानाधारक असल्याचे पोलिसांच्या तपासात समोर आले आहे. स्पाच्या आडून कथित वेश्याव्यवसाय सुरू ठेवणे, त्याचे व्यवस्थापन करणे आणि त्यासाठी आवश्यक सुविधा उपलब्ध करून देण्यात त्याची भूमिका असल्याचा आरोप आहे. 

या प्रकरणातील दुसरा आरोपी राजेन्द्र पुंडलिकराव चव्हाण (रा. यशवंत कॉलनी, रिंग रोड, जळगाव) हा संबंधित जागेचा मालक व परवानादाता असल्याचे पोलिसांनी नमूद केले आहे. बेकायदेशीर व्यवसायासाठी जागा भाडेतत्त्वावर उपलब्ध करून दिल्याचा आरोप त्याच्यावर ठेवण्यात आला आहे.पोलिसांनी या दोघांविरुद्ध ‘अनैतिक वाहतूक (प्रतिबंध) अधिनियम, १९५६’ अंतर्गत गुन्हा दाखल केला आहे. छाप्यात सापडलेल्या महिलांची चौकशी करून या संपूर्ण प्रकरणामागे आणखी कोणाचा सहभाग आहे का, याचा शोध घेतला जात आहे.