इंडो-तिबेटियन बॉर्डर पोलीस फोर्स अर्थात ITBP ने वैद्यकीय क्षेत्रातील उमेदवारांसाठी मोठी भरती जाहीर केली आहे. या भरती प्रक्रियेद्वारे मेडिकल ऑफिसर, स्पेशालिस्ट मेडिकल ऑफिसर आणि सुपर स्पेशालिस्ट मेडिकल ऑफिसर अशा पदांवर एकूण २८२ डॉक्टरांची नियुक्ती केली जाणार आहे. सरकारी नोकरीसह देशसेवेची इच्छा असलेल्या वैद्यकीय उमेदवारांसाठी ही मोठी संधी मानली जात आहे.
या भरतीसाठी ऑनलाइन अर्ज प्रक्रिया सुरू झाली असून ८ सप्टेंबर २०२६ पर्यंत अर्ज करता येणार आहे. उमेदवारांनी अंतिम मुदतीपूर्वी अर्ज प्रक्रिया पूर्ण करण्याचे आवाहन करण्यात आले आहे.
कोणत्या पदांसाठी किती जागा?
ITBP वैद्यकीय अधिकारी भरतीमध्ये एकूण २८२ पदांचा समावेश आहे.
सुपर स्पेशालिस्ट मेडिकल ऑफिसर : ५ पदे
स्पेशालिस्ट मेडिकल ऑफिसर : १६२ पदे
मेडिकल ऑफिसर : ११५ पदे
या भरतीच्या माध्यमातून BSF, CRPF, ITBP, SSB आणि आसाम रायफल्स यांसारख्या केंद्रीय सशस्त्र पोलीस दलांमध्ये वैद्यकीय अधिकाऱ्यांची नियुक्ती केली जाणार आहे.
शैक्षणिक पात्रता काय?
मेडिकल ऑफिसर पदासाठी उमेदवाराकडे मान्यताप्राप्त विद्यापीठ किंवा संस्थेची MBBS पदवी असणे आवश्यक आहे. तसेच अनिवार्य रोटेटिंग इंटर्नशिप पूर्ण केलेली असावी.
स्पेशालिस्ट मेडिकल ऑफिसर पदासाठी MBBS सोबत संबंधित विषयातील पदव्युत्तर पदवी किंवा डिप्लोमा आवश्यक आहे.
तर सुपर स्पेशालिस्ट मेडिकल ऑफिसर पदासाठी MBBS, संबंधित विषयातील पदव्युत्तर पदवी आणि DM किंवा M.Ch. यांसारखी सुपरस्पेशालिटी पदवी आवश्यक आहे.
सर्व उमेदवारांची राष्ट्रीय वैद्यकीय आयोग (NMC) किंवा राज्य वैद्यकीय परिषदेकडे वैध नोंदणी असणे आवश्यक आहे. अंतिम वर्षातील विद्यार्थी या भरतीसाठी पात्र ठरणार नाहीत.
वयोमर्यादा किती?
मेडिकल ऑफिसर पदासाठी उमेदवाराचे कमाल वय ३० वर्षे असावे. तर स्पेशालिस्ट आणि सुपर स्पेशालिस्ट मेडिकल ऑफिसर पदांसाठी कमाल वयोमर्यादा ५० वर्षे आहे. आरक्षित प्रवर्गातील उमेदवारांना नियमानुसार वयोमर्यादेत सवलत मिळू शकते.
लेखी परीक्षा नाही!
या भरतीचे सर्वात महत्त्वाचे वैशिष्ट्य म्हणजे उमेदवारांना कोणतीही लेखी परीक्षा द्यावी लागणार नाही. सुरुवातीला शैक्षणिक आणि व्यावसायिक कागदपत्रांची पडताळणी केली जाईल. त्यानंतर पात्र उमेदवारांना वैयक्तिक मुलाखतीसाठी बोलावले जाईल.
मुलाखतीदरम्यान उमेदवारांची उंची, छाती आणि वजन यांसह आवश्यक शारीरिक निकष तपासले जातील. त्यानंतर उमेदवारांना निर्धारित वैद्यकीय मानकांची पूर्तता करावी लागेल. या सर्व प्रक्रियेनंतर पात्र उमेदवारांची नियुक्ती केली जाणार आहे.
सरकारी नोकरीसह केंद्रीय सशस्त्र पोलीस दलात वैद्यकीय सेवा बजावण्याची इच्छा असलेल्या डॉक्टरांसाठी ही भरती महत्त्वाची संधी आहे. इच्छुक उमेदवारांनी अर्ज करण्यापूर्वी अधिकृत अधिसूचनेतील पात्रता, वयोमर्यादा आणि इतर अटी काळजीपूर्वक तपासणे आवश्यक आहे.
Discussion about this post