जळगाव । जळगाव जिल्ह्यात अवैध शस्त्रांविरोधात पोलिसांनी उघडलेल्या धडक मोहिमेअंतर्गत शनीपेठ पोलिसांच्या पथकाने धडक कारवाई करत एका संशयिताला बेड्या ठोकल्या आहेत. शहरातील स्मशानभूमीजवळील उमेश बिअर शॉपी परिसरातून या इसमाला तावडीत घेण्यात आले असून, त्याच्याकडून एक देशी बनावटीचे पिस्तूल आणि दोन जिवंत काडतुसे जप्त करण्यात आली आहेत.प्रकाश तोलार (मूळ रा. खेडी, ता. जळगाव, सध्या रा. साई सिटी, जळगाव) असे अटक करण्यात आलेल्या संशयित आरोपीचे नाव आहे.
गुप्त माहितीवरून टाकली धाड
जिल्ह्यात अवैध अग्निशस्त्रे बाळगणाऱ्यांवर कठोर कारवाई करण्याचे निर्देश पोलीस अधीक्षक श्रीकांत धिवरे यांनी सर्व पोलीस ठाण्यांना दिले आहेत. त्यानुसार शनीपेठ पोलीस ठाण्याचे प्रभारी अधिकारी विशाल जयस्वाल हे पथकासह गस्तीवर असताना, १० ऑगस्ट रोजी स्मशानभूमीजवळील उमेश बिअर शॉपीजवळ एक इसम अवैध शस्त्रासह फिरत असल्याची गुप्त बातमी पोलिसांना मिळाली.
माहितीची तात्काळ खात्री करून पोलिसांनी पथकासह घटनास्थळी सापळा रचला आणि संशयित प्रकाश तोलार याला ताब्यात घेतले. त्याची अंगझडती घेतली असता त्याच्याजवळ बेकायदेशीर बाळगलेले एक देशी बनावटीचे पिस्तूल आणि दोन जिवंत काडतुसे मिळून आली. पोलिसांनी सर्व मुद्देमाल जप्त केला असून, याप्रकरणी शनीपेठ पोलीस ठाण्यात गुन्हा दाखल करण्यात आला आहे.
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत आणि उपविभागीय पोलीस अधिकारी नितीन गणापुरे यांच्या मार्गदर्शनाखाली शनीपेठचे पोलीस निरीक्षक विशाल जयस्वाल यांच्या नेतृत्वाखालील पथकाने केली. या पथकात पोलीस उपनिरीक्षक संतोष खेडेकर, प्रो. पो. उपनिरीक्षक अभिषेक कटारे, ग्रेड पो. उपनिरीक्षक नितीन पाटील, पोलीस अंमलदार विजय खैरे, योगेश जाधव, महेंद्र पाटील, पराग दुसाने, अमोल वंजारी, निलेश घुगे, गणेश ढाकणे आणि योगेश साबळे यांचा समावेश होता.
Discussion about this post