नंदुरबार : महाराष्ट्राच्या राजकारणातून मोठी घडामोड समोर आली असून, भाजपचे उत्तर महाराष्ट्र संयोजक विजय चौधरी यांनी आपल्या पदाचा राजीनामा दिला आहे. गेल्या काही दिवसांपासून व्हायरल होत असलेल्या कथित ऑडिओ क्लिपच्या पार्श्वभूमीवर त्यांनी हा निर्णय घेतला असून, विरोधकांनी बनावट क्लिप व्हायरल करून आपली व पक्षाची बदनामी करण्यासाठी षड्यंत्र रचल्याचा आरोप त्यांनी केला आहे.
पक्षाच्या वरिष्ठ नेत्यांना पाठविलेल्या राजीनामा पत्रात विजय चौधरी यांनी आपल्यावरील सर्व आरोप फेटाळून लावले आहेत. तसेच या संपूर्ण प्रकरणाची पक्षाच्या वरिष्ठ पदाधिकाऱ्यांमार्फत निष्पक्ष चौकशी करण्यात यावी, अशी मागणी त्यांनी केली आहे. पदावर राहून चौकशी झाल्यास तिच्यावर प्रश्नचिन्ह निर्माण होऊ शकते. त्यामुळे चौकशी पारदर्शक व्हावी, या उद्देशाने आपण उत्तर महाराष्ट्र संयोजक पदाचा राजीनामा देत असल्याचे त्यांनी स्पष्ट केले.
विजय चौधरी यांनी गेल्या १३ वर्षांत भाजपमध्ये विविध पदांवर काम केले आहे. मात्र, अलीकडच्या काळात सोशल मीडियावर त्यांच्या नावाने काही कथित ऑडिओ क्लिप व्हायरल झाल्यानंतर राजकीय वातावरण तापले आहे. या क्लिपमधील संभाषणांबाबत विविध दावे-प्रतिदावे होत असून, त्यांच्या सत्यतेबाबत अधिकृत पुष्टी झालेली नाही.
दरम्यान, भाजपच्या माजी खासदार हिना गावित यांच्याबाबत कथित आक्षेपार्ह वक्तव्य केल्याचा आरोप करत विजय चौधरी यांच्याविरोधात नंदुरबार शहर पोलीस ठाण्यात गुन्हा दाखल करण्यात आला आहे.
विजय चौधरी यांच्या राजीनाम्यानंतर उत्तर महाराष्ट्रातील भाजपच्या राजकारणात नव्या चर्चांना उधाण आले असून, पक्षाची पुढील भूमिका काय असेल आणि चौकशीचा निकाल काय लागेल, याकडे राजकीय वर्तुळाचे लक्ष लागले आहे.
Discussion about this post