नाशिक महापालिकेच्या राजकारणात पुन्हा एकदा मोठ्या घडामोडींची चर्चा रंगली आहे. ठाकरे गटाच्या शिवसेनेतील काही नगरसेवक शिंदे गटाच्या संपर्कात असल्याची माहिती राजकीय वर्तुळात चर्चेचा विषय ठरली आहे. सूत्रांच्या माहितीनुसार, ठाकरे गटातील १० ते १२ नगरसेवक शिंदे गटात प्रवेश करण्याच्या तयारीत असल्याची चर्चा असून, यामुळे नाशिकच्या राजकारणात नव्या समीकरणांची शक्यता वर्तवली जात आहे.
मिळालेल्या माहितीनुसार, गेल्या काही दिवसांत ठाकरे गटातील काही नगरसेवकांच्या वरिष्ठ नेत्यांसोबत बैठका झाल्या आहेत. आगामी स्थानिक स्वराज्य संस्थांच्या निवडणुकांच्या पार्श्वभूमीवर संघटन मजबूत करण्यासाठी शिंदे गटाकडून हालचाली सुरू असल्याचे बोलले जात आहे. काही नगरसेवकांना प्रभागनिहाय विशेष विकास निधी मिळणार असल्याच्याही चर्चा रंगल्या आहेत. तसेच ठाकरे गटातील एका वरिष्ठ नेत्याच्या संभाव्य पक्षांतराबाबतही राजकीय वर्तुळात चर्चा सुरू आहे.
या चर्चांवर प्रतिक्रिया देताना शिंदे गटाचे उपनेते अजय बोरस्ते यांनी, मुख्यमंत्री एकनाथ शिंदे यांच्या नेतृत्वावर अनेक शिवसैनिकांचा विश्वास असल्याचे सांगितले. पक्षात येण्याची इच्छा व्यक्त करणाऱ्यांचे स्वागतच केले जाईल, असे त्यांनी स्पष्ट केले. मात्र, प्रभागनिहाय पाच कोटी रुपयांचा निधी देण्याबाबत कोणतीही अधिकृत हमी दिलेली नसून, अशा चर्चा अफवा असल्याचे त्यांनी नमूद केले.
बोरस्ते यांनी पुढे सांगितले की, शिवसेनेतील अनेक नेत्यांशी नियमित संपर्क असल्याने स्वतंत्र बैठकीची आवश्यकता नसते. कोणत्याही पक्षाचा अस्त संपवण्याची भूमिका नसून, विकासाच्या मुद्द्यावर अधिकाधिक लोक शिंदे यांच्या नेतृत्वाकडे आकर्षित होत असल्याचा दावा त्यांनी केला. आगामी जिल्हा परिषद निवडणुकांमध्येही शिंदे गटाची ताकद वाढलेली दिसेल, असा विश्वासही त्यांनी व्यक्त केला.
दरम्यान, या सर्व घडामोडींमुळे नाशिक महापालिकेतील राजकीय समीकरणांमध्ये मोठे बदल होण्याची शक्यता व्यक्त केली जात असली, तरी संभाव्य पक्षांतराबाबत संबंधित नगरसेवकांकडून अद्याप कोणतीही अधिकृत भूमिका जाहीर करण्यात आलेली नाही. त्यामुळे पुढील काही दिवसांत नाशिकच्या राजकारणात कोणते नवे वळण येते, याकडे सर्वांचे लक्ष लागले आहे.
Discussion about this post