एकनाथ खडसेंच्या वाढदिवसाचा ‘तो’ किस्सा सांगताना मंत्री महाजन खदखदून हसले; काय आहे तो किस्सा?

जळगाव । जळगावच्या राजकारणात भाजपचे संकटमोचक मंत्री गिरीश महाजन आणि राष्ट्रवादीचे ज्येष्ठ नेते एकनाथ खडसे (नाथाभाऊ) यांचे विळ्या-भोपळ्याचे नाते संपूर्ण महाराष्ट्राला माहिती आहे. एकमेकांना डिवचण्याची आणि आरोपांच्या फैरी झाडण्याची एकही संधी हे दोन्ही नेते सोडत नाहीत. दरम्यान, जळगावात एका कार्यक्रमात आमदार सुरेश भोळे यांना वाढदिवसाच्या शुभेच्छा देताना गिरीश महाजन यांनी एकनाथ खडसेंच्या वाढदिवसाचा एक अजब किस्सा जाहीरपणे सांगितला. या किस्स्यामुळे उपस्थित नेत्यांमध्ये एकच हशा पिकला असला, तरी आता यावरून जळगावचे राजकारण कमालीचे तापण्याची शक्यता निर्माण झाली आहे.

नेमका काय आहे तो किस्सा?

जळगाव विधान परिषद निवडणुकीच्या पार्श्वभूमीवर महायुतीची एक महत्त्वाची बैठक पार पडली. या बैठकीनंतर जळगाव शहराचे भाजप आमदार सुरेश भोळे यांचा १३ जून ला वाढदिवस असल्याने, मंत्री गिरीश महाजन यांनी त्यांना आगाऊ शुभेच्छा दिल्या. आमदार भोळेंना शुभेच्छा देत असताना महाजन यांना नाथाभाऊंच्या वाढदिवसाची आठवण झाली.

महाजन म्हणाले की, “एकदा नाथाभाऊंच्या वाढदिवसाला काही अतिउत्साही कार्यकर्त्यांनी थेट ‘एकनाथ खडसे अमर रहे… अमर रहे…’ अशा घोषणा द्यायला सुरुवात केली होती!” महाजन यांनी हा किस्सा सांगताच मंचावरील आमदार आणि इतर पदाधिकाऱ्यांमध्ये एकच हशा पिकला. हा किस्सा सांगताना स्वतः गिरीश महाजन देखील खदखदून हसताना पाहायला मिळाले.

“व्हिडिओ काढू नका… शुटींग बंद करा!”
मंत्री गिरीश महाजन जेव्हा हा किस्सा सांगत होते, तेव्हा तिथे उपस्थित असलेल्या काही ज्येष्ठ पदाधिकाऱ्यांना या विधानाचे गांभीर्य लक्षात आले. यामुळे वाद निर्माण होऊ शकतो, हे ओळखून काही पदाधिकाऱ्यांनी कार्यकर्त्यांना तात्काळ “याचे मोबाईलवर शुटींग करू नका, व्हिडिओ काढू नका,” असे आवाहन केले. मात्र, तरीही हा व्हिडिओ कॅमेऱ्यात कैद झाला आणि आता तो समोर आल्याने राजकीय वर्तुळात वाऱ्यासारखा पसरत आहे.

जळगाव विधान परिषदेच्या रणधुमाळीत आधीच राजकीय वातावरण गरम आहे. त्यातच महायुतीच्या अधिकृत बैठकीनंतर हा प्रकार घडल्यामुळे आता भाजप आणि खडसे समर्थकांमध्ये नवा कलगीतुरा रंगण्याची चिन्हे आहेत. गिरीश महाजन यांनी जाहीरपणे उडवलेली ही खिल्ली एकनाथ खडसे यांच्या जिव्हारी लागण्याची शक्यता असून, यावर आता नाथाभाऊ काय पलटवार करतात? याकडे संपूर्ण जिल्ह्याचे लक्ष लागले आहे. दरम्यान, या व्हिडिओवर एकनाथ खडसे यांची अद्याप कोणतीही अधिकृत प्रतिक्रिया समोर आलेली नाही.