धावपट्टीवर विमान उतरले अन्…; आसाममध्ये वायुसेनेच्या मालवाहू विमानाला भीषण अपघात

आसाममधील जोरहाट एअरबेसवर शनिवारी भारतीय वायुसेनेच्या (IAF) एका ‘AN-32’ या मालवाहू विमानाला लँडिंगदरम्यान भीषण अपघात झाला. विमानाने धावपट्टीवर सुरक्षित लँडिंग केले होते, मात्र त्यानंतर अवघ्या काही सेकंदांतच विमानाला अचानक आग लागली. विमानातून आगीच्या प्रचंड लपट आणि धुराचे लोट उठल्याने संपूर्ण एअरबेसवर एकच खळबळ उडाली.

धावपट्टीवर थरार; युद्धपातळीवर बचावकार्य सुरू
प्राथमिक माहितीनुसार, विमानाने एअरपोर्टच्या धावपट्टीवर यशस्वी लँडिंग केले होते, पण त्यानंतर लगेचच त्यात अचानक आग लागली. आगीची भीषणता पाहता हवाई दलाचे आपत्कालीन पथक आणि अग्निशामक दलाच्या गाड्या तात्काळ घटनास्थळी दाखल झाल्या. आग आटोक्यात आणण्यासाठी आणि विमानातील चालकांसह (पायलट) इतर कर्मचाऱ्यांना सुरक्षितपणे बाहेर काढण्यासाठी युद्धपातळीवर आपत्कालीन बचावकार्य सुरू करण्यात आले आहे.

Indian Air Force AN-32 Aircraft crashed during the landing at the Jorhat Air Force Station in Assam.

More details Awaited. pic.twitter.com/KKzNKVERYH

— Chauhan (@Platypuss_10) June 13, 2026

हवाई दलाकडून अधिकृत प्रसिद्धीपत्रक जारी
या गंभीर घटनेनंतर भारतीय हवाई दलाकडून अधिकृत प्रसिद्धीपत्रक जारी करण्यात आले आहे. “आज जोरहाटमध्ये भारतीय हवाई दलाच्या एका एएन-३२ विमानाचा अपघात झाला आहे. अधिक माहिती मिळाल्यानंतर पुढील तपशील देण्यात येईल,” असे हवाई दलाकडून स्पष्ट करण्यात आले आहे.

आगीचे कारण अद्याप अस्पष्ट
या अपघातात विमानातील कर्मचाऱ्यांच्या जीवितहानीबद्दल किंवा त्यांच्या प्रकृतीबद्दल हवाई दलाच्या अधिकाऱ्यांनी अद्याप कोणतीही अधिकृत माहिती दिलेली नाही. विमानाला आग लागण्याचे नेमके तांत्रिक कारण काय होते, याचा शोध हवाई दलाचे वरिष्ठ अधिकारी आणि तज्ज्ञ घेत आहेत.