भुसावळ | भुसावळ तालुक्यातील सुनसगाव शिवारात मध्यरात्री घडलेल्या भीषण अपघाताने परिसर हादरला आहे. सुदर्शन पेपर मिलसमोर झोपलेल्या एका मजुराच्या अंगावर रेतीने भरलेला डंपर रिव्हर्स घेताना गेल्याने त्याचा जागीच मृत्यू झाला. अपघातानंतर चालकाने कोणतीही मदत न करता डंपरसह घटनास्थळावरून पलायन केल्याने संताप व्यक्त होत आहे.
मृत मजुराची ओळख राजाभैय्या नत्थू (वय ३८, मूळ रा. धरदुवा, उत्तर प्रदेश) अशी झाली असून ते सध्या सुदर्शन पेपर मिल परिसरात वास्तव्यास होते. रोजच्या कामानंतर ते कंपनीसमोरील मोकळ्या जागेत झोपले होते.
४ जूनच्या मध्यरात्री सुमारे २.५० वाजता रेतीने भरलेला एमएच-१९-झेड-८३८८ क्रमांकाचा डंपर मागे घेत असताना चालकाचे खाली झोपलेल्या मजुराकडे लक्ष गेले नाही. परिणामी डंपरचे चाक त्यांच्या शरीरावरून गेल्याने गंभीर दुखापत होऊन त्यांचा जागीच मृत्यू झाला.
अपघाताची जाणीव असूनही चालकाने जखमीला उपचारासाठी रुग्णालयात दाखल करण्याचा किंवा पोलिसांना माहिती देण्याचा कोणताही प्रयत्न केला नाही. उलट, घटनास्थळावरून डंपरसह फरार होऊन त्याने जबाबदारी टाळण्याचा प्रयत्न केल्याचा आरोप करण्यात येत आहे.
या प्रकरणी भुसावळ तालुका पोलीस ठाण्यात अज्ञात डंपर चालकाविरुद्ध गुन्हा दाखल करण्याची प्रक्रिया सुरू करण्यात आली आहे. पोलीस हेड कॉन्स्टेबल धीरज जनार्दन मंडलिक यांनी सरकारतर्फे फिर्याद दिली असून फरार चालकाचा शोध घेण्यासाठी विशेष पथक नियुक्त करण्यात आले आहे.
दरम्यान, ऑनलाईन CCTNS प्रणालीतील तांत्रिक अडचणीमुळे गुन्हा नोंदविण्यास विलंब झाल्याची माहिती पोलिसांनी दिली आहे. परिसरातील सीसीटीव्ही फुटेज आणि अन्य पुराव्यांच्या आधारे आरोपी चालकाचा शोध सुरू असून, या घटनेमुळे मजूर वसाहतींमध्ये भीतीचे वातावरण निर्माण झाले आहे.
Discussion about this post