जळगाव । धरणगाव आणि भुसावळ येथे पोलिसांकडून करण्यात आलेल्या दोन स्वतंत्र कारवायांमध्ये गावठी पिस्तुलांसह तिघांना अटक करण्यात आली आहे. या कारवायांमध्ये एकूण ६६ हजार रुपयांचा मुद्देमाल जप्त करण्यात आला आहे.
धरणगावमध्ये गावठी पिस्तुलासह एक जण अटकेत
धरणगाव पोलीस स्टेशनच्या हद्दीत १४ मे २०२६ रोजी सायंकाळी ४:३० वाजेच्या सुमारास गिरणा नदीच्या पात्रात एक संशयित इसम फिरत असल्याची माहिती पोलिसांना मिळाली होती. त्यानुसार पोलिसांनी सापळा रचून आनंदा बळीराम सपकाळे (वय ३९, रा. सिद्धार्थ नगर, आव्हाणे, ता. जळगाव) याला ताब्यात घेतले.
झडतीदरम्यान त्याच्याकडून २५ हजार रुपये किमतीचे लोखंडी सिल्व्हर रंगाचे गावठी बनावटीचे पिस्तूल आणि मॅगझिन जप्त करण्यात आले. संबंधित शस्त्राचा कोणताही परवाना आरोपीकडे नसल्याचे निष्पन्न झाल्यानंतर त्याच्याविरोधात गुन्हा दाखल करत अटक करण्यात आली.
भुसावळमध्ये पिस्तूल आणि जिवंत काडतुसासह दोघे जेरबंद
दरम्यान, भुसावळ शहरातील बाजारपेठ पोलीस स्टेशनच्या पथकानेही मध्यरात्री मोठी कारवाई करत दोन संशयितांना अटक केली. शिरपूर-कन्हाळा रोडवरील घोडे पीर बाबा दर्ग्याच्या मागील मोकळ्या जागेत संशयास्पद हालचाली सुरू असल्याची माहिती पोलिसांना मिळाली होती. त्यानुसार १४ मे रोजी रात्री १२:१० वाजेच्या सुमारास धाड टाकण्यात आली.
या कारवाईत पोलिसांनी एक गावठी बनावटीचे पिस्तूल, त्याचे मॅगझिन आणि एक जिवंत काडतूस जप्त केले. जप्त मुद्देमालाची किंमत सुमारे ४१ हजार रुपये असल्याचे सांगण्यात आले.
या प्रकरणी असद अली शेख खालीद अली (वय १९, रा. आझाद नगर, बुऱ्हाणपूर, मध्य प्रदेश) आणि मोहम्मद राजीक मोहम्मद आरिफ (रा. मुस्लिम कॉलनी, भुसावळ) यांना अटक करण्यात आली आहे. आरोपींविरोधात आर्म अॅक्ट तसेच महाराष्ट्र पोलीस अधिनियमांतर्गत गुन्हा दाखल करण्यात आला असून पुढील तपास पोलीस हेड कॉन्स्टेबल कांतीलाल केदारे करत आहेत.
Discussion about this post