हुंड्याच्या लालसेपोटी २३ वर्षीय विवाहितेची आत्महत्या; हृदय पिळवटून टाकणारा शेवटचा मॅसेज समोर

अहिल्यानगर: सुखी संसाराची स्वप्ने उराशी बाळगून सासरी आलेल्या एका २३ वर्षीय निष्पाप विवाहितेचा हुंड्याच्या लालसेपोटी अत्यंत वेदनादायक अंत झाल्याची धक्कादायक घटना समोर आली आहे. सासरच्या अमानुष शारीरिक आणि मानसिक छळाला कंटाळून प्रिया शुभम ढगे या विवाहितेने विहिरीत उडी मारून आपले आयुष्य संपवले. ही हृदय पिळवटून टाकणारी घटना राहाता तालुक्यातील एकरुखे गावात घडली आहे. या घटनेमुळे परिसरात तीव्र संताप आणि हळहळ व्यक्त होत आहे.

मिळालेल्या माहितीनुसार, घर बांधण्यासाठी माहेरून ४ लाख रुपये घेऊन ये, या मागणीसाठी सासरच्या मंडळींकडून प्रियाचा छळ सुरू होता. प्रियाचा नवरा शुभम ढगे, सासरा राजेंद्र ढगे आणि सासू प्रतिभा ढगे हे तिचा वारंवार मानसिक आणि शारीरिक छळ करत होते. इतकेच नव्हे, तर तिला अनेकदा उपाशीपोटी ठेवले जात असल्याची धक्कादायक माहितीही तपासात समोर आली आहे. २०२४ पासून सुरू असलेला हा छळ दिवसेंदिवस असह्य झाल्याने अखेर प्रियाने टोकाचे पाऊल उचलले.

प्रियाच्या मृत्यूनंतर तिच्या कुटुंबावर दुःखाचा डोंगर कोसळला असून एकरुखे गावावर शोककळा पसरली आहे. याप्रकरणी राहाता पोलीस ठाण्यात गुन्हा दाखल करण्यात आला असून, पोलिसांनी तत्परता दाखवत मृत प्रियाचा नवरा शुभम ढगे, सासरा राजेंद्र ढगे आणि सासू प्रतिभा ढगे या तिघांनाही अटक केली आहे. आरोपींवर भारतीय न्याय संहितेच्या (BNS) विविध कलमांनुसार गुन्हा दाखल करण्यात आला असून पोलीस पुढील तपास करत आहेत.एका निष्पाप मुलीच्या आयुष्याचा असा दुर्दैवी शेवट झाला. हुंड्याच्या लालसेपायी अजून किती जीव जाणार? हा प्रश्न पुन्हा उपस्थित केला जात आहे.

आत्महत्या केलेल्या प्रियाचा शेवटचा मोबाईल मॅसेज –
ताई/काकी,

तुम्ही माझ्यासाठी खूप काही केलं, पण आता मला काहीच नको आहे. मी खूप सहन केलं. माझी श्रेया माझ्याजवळ नाही. मी तिला खूप मिस करते पण ती नाही येणार माझ्याकडे. माझा नवरा शुभम , मी त्याच्यावर खूप प्रेम केलं, पण त्याने कधीच माझ्यावर तसं प्रेम केलं नाही. त्याचं प्रेम फक्त त्याच्या कुटुंबावर आहे. आज सगळं काही माझ्या सासूमुळे झालं आहे. फक्त आमचं भांडण कसं होईल हेच तिला पाहिजे. ताई श्रेयाची काळजी घे. तुझ्यावर सोपवून जाते मी श्रेयाला. आज जगामध्ये मी नाही. पण शुभमवर प्रेम करत राहील मी. फक्त एकच इच्छा आहे शुभमला विचार मी काय केलं होतं? की ते मला सोडून गेले.

माझी श्रेया मला मम्मी म्हणायची. एक महिना झाला तिला पाहिलंही नाही. खूप मिस करतेय श्रेयाला. सॉरी श्रेया तुझ्यासाठी मी काहीच करू शकले नाही. आज सगळे बोलत आहेत की मी चूकी केली आहे. पण मी चोरी नाही केली. अक्काचे पैसेही नाही घेतले. मला नोकरी करायची होती पण घरचे नाही बोलले. फक्त आता कोणालाही टेन्शन नाही द्यायचे. शुभमला सांगा, करा मजा आता मी गेले तुमच्या लाईफमधून आता. माझी शेवटची एकच इच्छा आहे माझ्या श्रेयाचा सांभाळ कर ताई. आता मला काहीच नको आहे. सॉरी Love you Shreya’